ئه‌نجوومه‌نی وه‌زیران بۆ تاوتوێكردنی چه‌ند پرسێك كۆده‌بێته‌وه‌

كۆبوونه‌وه‌یه‌كی ئه‌نجوومه‌نی وه‌زیران به‌ سه‌رپه‌رشتی مه‌سرور بارزانی، سه‌رۆكی ئه‌نجوومه‌نی وه‌زیران
كۆبوونه‌وه‌یه‌كی ئه‌نجوومه‌نی وه‌زیران به‌ سه‌رپه‌رشتی مه‌سرور بارزانی، سه‌رۆكی ئه‌نجوومه‌نی وه‌زیران

K24 - هه‌ولێر:

ئه‌نجوومه‌نی وه‌زیرانی هه‌رێمی كوردستان به‌ سه‌رپه‌رشتی مه‌سرور بارزانی، سه‌رۆكی حكومه‌تی هه‌رێمی كوردستان كۆده‌بێته‌وه‌.

فه‌رمانگه‌ی میدیا و زانیاری بڵاویكردووه‌ته‌وه‌، ئەمڕۆ چوارشەممە، 8ـی شووباتی 2023، ئەنجوومەنی وەزیرانی هەرێمی کوردستان، بە سەرپەرشتی مەسرور بارزانی، سەرۆکی ئەنجومەنی وەزیرانی ھەرێمی کوردستان کۆبوونەوەی ئاسایی خۆی ئەنجام دەدات و تیایدا گفتوگۆی چەند تەوەرێک دەکات.

له‌ راگه‌یه‌ندراوه‌كه‌ی فه‌رمانگه‌ی میدیا و زانیاریدا هاتووه‌: لە بڕگەی یەکەمی کۆبوونەوەکەدا ڕاپۆڕتێک سەبارەت بە روودانی دوایین بوومەلەرزە لە هەرێمی کوردستان و ڕێوشوێن و ڕێکارەکانی خۆپارێزی و یارمەتیدانی هەردوو وڵاتی دراوسێ (سوریا و تورکیا) دەخرێتەڕوو.

ئه‌وه‌ش خراوه‌ته‌ڕوو، بڕگەی دووەمی کۆبوونەوەکە تایبەت دەبێت بە تاوتوێ و پەسندکردنی ڕەشنووسی پڕۆژەیاسای "بەرکارکردنی یاسای بەرەنگاربوونەوەی شووشتنەوەی مایە و مایەدارکردنی تیرۆری فیدراڵی" لە هەرێمی کوردستان و "پەیڕەوی دەستەی متمانەبەخشین بە دامەزراوەکان و پڕۆگرامەکـانی پەروەردە و خوێندنی باڵا”.

له‌ كۆتایی راگه‌یه‌ندراوه‌كه‌دا هاتووه‌: رای حکومەتی هەرێمی کوردستان سەبارەت بە ڕەشنووسی یاسای دادگای باڵای ئیتیحادی لە بڕگەی سێیەم و کۆتایی کۆبوونەوەکەدا دەخرێتەڕوو.