نەتەوە یەکگرتووەکان: بەپەلە ئاگربەست لە سوریا رابگەیەنن
K24 - هەولێر:
بەرپرسی رێکخراوی نەتەوە یەکگرتووەکان داوای دەستبەجێ راگەیاندنی ئاگربەستی لە سوریا دەکات، بەمەبەستی ئاسانکاری زیاتر لە گەیاندنی هاوکاری بۆ هەموو قوربانیانی بوومەلەرزە وێرانکەرەکەی ناوچەکە.
رێکخراوەکە لە تویتێکدا ئەوەی خستووەتەڕوو، لەم کاتە ناهەموارەی کە تورکیا و سووریا پێیدا تێدەپەڕن، داوای گەیاندنی بەپەلەی هاوکاری دەکەین بۆ هەموو ئەوانەی کە پێویستیان پێیەتی.
ئاماژەی بەوەشدا، ڤۆڵکەر تورک، بەرپرسی مافی مرۆڤ لە نەتەوە یەکگرتووەکان داوای راگەیاندنی دەستبەجێی ئاگربەست لە سوریا دەکات.
لە تویتەکەدا هاتووە، کە ئەو بەرپرسەی نەتەوە یەکگرتووەکان داوا دەکات رێز لە مافەکانی مرۆڤ بگیرێت و هەمووان پابەندی یاسا مرۆییەکان بن بۆئەوەی یارمەتی بگاتە دەستی هەموو ئەوانەی پێویستیان پێیەتی.
At this terrible time in #Türkiye & #Syria, we call for urgent delivery of assistance to ALL in need. UN Human Rights Chief @volker_turk calls for immediate ceasefire in Syria, and full respect of #humanrights & humanitarian law obligations so help can reach everyone. pic.twitter.com/l9MJEQixYg
— UN Human Rights (@UNHumanRights) February 10, 2023
به‌ره‌به‌یانی رۆژی دووشه‌ممه، (6ـی شوبات/فێبرایه‌ری 2023)، بوومه‌له‌رزه‌یه‌ك به گوڕی 7.8 پله به پێوه‌ری رێخته‌ر، هه‌ر یه‌كه له پارێزگاكانی دیاربه‌كر، مه‌ڕه‌ش، ئادیامان (سه‌مه‌سور)، دیلۆك، روحا، مه‌له‌تییا و كێلیس له باكووری كوردستان و پارێزگاكانی هاتای، ئادانه، ئوسمانییه و ئه‌سكه‌ندرۆن له توركیا هه‌ژاند. چه‌قی بوومه‌له‌رزه‌كه پارێزگای مه‌ڕه‌شی باكووری كوردستان بوو، هه‌ر بۆیه ژماره‌ی زۆرینه‌ی قوربانیانی بوومه‌له‌رزه‌كه له‌و پارێزگایه تۆماركراون. دوای ئه‌و بوومه‌له‌رزه چه‌ندین پاشله‌رزه‌ی دیكه‌ی به‌هێز به پله‌كانی 5.8، 6.2 و 6.4 چه‌ندین پارێزگای ئه‌و وڵاته هه‌ژاند.
ئەمڕۆش له میانه‌ی گوتارێكدا ره‌جه‌ب ته‌یب ئەردۆغان رایگەیاند، لە ئەنجامی ئەو بوومەلەرزانەی کە ناوەندەکەیان مەڕەش بوو، تاوەکو ئێستا 18 هەزار و 991 کەس گیانیان لەدەستداوە و 75 هەزار و 523 کەسیش رزگارکراون.
بە گوێرەی دوایین زانیارییەکان، بەهۆی بوومەلەرزەکەوە، سێ هەزار و 377 کەس لە سووریا و رۆژئاوای کوردستان گیانیان لەدەستداوە و پێنج هەزار و 245 کەس برینداربوون.