بەنداوی خنس كە توانای گلدانەوەی 7 ملیۆن مەتر سێجا ئاوی هەیە بەگەڕدەخرێت
K24 - هه‌ولێر:
فه‌رمانگه‌ی میدیا و زانیاریی حكومه‌تی هه‌رێمی كوردستان رایگه‌یاند، بەنداوی خنس لە پارێزگای دهۆك، لە قۆناغی كۆتایی و تاقیكردنەوەدایە كە توانای گلدانەوەی 7 ملیۆن مەتر سێجا ئاوی هەیە و گرنگی بۆ كەرتی كشتوكاڵ، سامانی ئاژەڵ، كەرتی گەشتوگوزاری و ئاوی ژێر زەوی دەبێت.
ئه‌مڕۆ دووشه‌ممه (20ـی شوبات/فێبرێوه‌ری 2023)، فه‌رمانگه‌ی میدیا و زانیاریی حكومه‌تی هه‌رێمی كوردستان بڵاویكردووه‌ته‌وه: كابینەی نۆیەمی حكومەتی هەرێمی كوردستان، لە ڕێگەی وەزارەتی کشتوکاڵ و سەرچاوەکانی ئاو، بۆ خزمەتكردنی كەرتی كشتوكاڵی و كەمكردنەوەی زیانەكانی وشكەساڵی، بایەخێكی ڕژدی بە دروستكردن و نۆژەنكردنەوەی بەنداوەكان داوە؛ لەم چوارچێوەیەدا دروستكردنی بەنداوی خنس لە پارێزگای دهۆك، لە قۆناغی كۆتایی و تاقیكردنەوەدایە كە توانای گلدانەوەی 7 ملیۆن مەتر سێجا ئاوی هەیە و گرنگی بۆ كەرتی كشتوكاڵ، سامانی ئاژەڵ، كەرتی گەشتوگوزاری و ئاوی ژێر زەوی دەبێت.
له‌وباره‌وه، فەرهاد محەمەد، بەڕێوەبەری بەنداوی دهۆک، بە پێگەی فەرمیی حكومەتی هەرێمی كوردستانی راگەیاند: "بەنداوی خنس هەموو كارێكی تەواو كراوە و دەست بە تاقیكردنەوەی تۆکمەیی و بەرگریی بەنداوەکە كراوە؛ لەبەر ئەوە ئەمساڵ پڕ لە ئاو كراوە و لەڕێی لیژنەیەکەوە لە بەڕێوەبەرایەتیی بەنداوی دهۆك چاودێریی كەموكوڕییەكانی دەكرێت و راپۆرتی پێویست لەسەری، ئاراستەی بەڕێوەبەرایەتیی گشتیی بەنداوەكان دەكرێت."
بەڕێوەبەری بەنداوی دهۆک ئاماژەی بەوەش دا "بەنداوی خنس لەساڵی 2010 بڕیاری دروستكردنی دەرچوو، بەڵام تەنیا توانرا 60%ـی تەواو بكرێت و كارەكانی ڕاگیران، تا لەكابینەی نۆیەم و لەساڵی 2021 دەست بە كاركردن کرایەوە و لە ساڵی 2022 توانرا تەواو بكرێت، بەڵام بۆ دڵنیابوون لە هەموو ئەو كارانەی تیایدا كراوە، تا دوو ساڵ چاودێری دەكەین".
به‌گوێره‌ی راگه‌یه‌ندراوی فه‌رمانگه‌ی میدیا و زانیاری، بەنداوی خنس لە جۆری خاکی پڕکراوەیە و دەكەوێتە قەزای شێخانی پارێزگای دهۆك، توانای گلدانەوەی 7 ملیۆن مەتر سێجا ئاوی هەیە؛ بەرزییەكەی 34.5 مەترە و درێژییەكەشی بە سەرڕێژەوە 195 مەترە، هەروەها دەرچەی ئاودەرەكەشی دوو بۆڕیی تیرە 90 و 50 سانتیمەتریین.
ئه‌وه‌ش خراوه‌ته‌ڕوو، تێچووی ئەم بەنداوە 90 ملیار و 218 ملیۆن 486 هەزار و 750 دینارە و لە ئێستاوە سوودی بۆ كەرتی كشتوكاڵی، ئاوی ژێر زەوی و كەرتی گەشتیاری دەبێت.