مه‌سرور بارزانی: ئه‌ڵمانیا هه‌میشه دۆست و هاوپه‌یمان بووه
K24 - هه‌ولێر:
مه‌سرور بارزانی، سه‌رۆكی حكومه‌تی هه‌رێمی كوردستان رایگه‌یاند، ئه‌ڵمانیا هه‌میشه دۆست و هاوپه‌یمانی هه‌رێمی كوردستان بووه و به‌یه‌كه‌وه هاوكاربوون بۆ تێكشاندنی داعش.
ئێواره‌ی ئه‌مڕۆ چوارشه‌ممه (8ـی ئادار/مارسی 2023)، مه‌سرور بارزانی، سه‌رۆكی حكومه‌تی هه‌رێمی كوردستان له تویتێكدا رایگه‌یاند، "ئه‌ڵمانیا هه‌میشه دۆست و هاوپه‌یمان بووه، به‌یكه‌وه، هاوكاربووین له تێكشكاندنی داعش".
له به‌شێكی دیكه‌ی تویته‌كه‌ی مه‌سرور بارزانیدا هاتووه، "ئامانجه‌كانمان وه‌ك خۆیان ده‌مێننه‌وه؛ كوردستانێكی سه‌قامگیر و به‌هێز، بازرگانی و وه‌به‌رهێنانی دوولایانه و پشتیوانیكردنی ئێزیدییه‌كان".
Germany has always been a friend and partner. Together, we helped turn the tide against ISIS.
— Masrour Barzani (@masrourbarzani) March 8, 2023
Our goals remain the same; a strong, stable KRI; bilateral trade and investment, and support for the Yazidis. pic.twitter.com/7wDLzmLNry
ئەمڕۆ چوارشەممە 8/3/2023، مەسرور بارزانی، سەرۆکی حکومەتی هەرێمی کوردستان و ئانالێنا بێربوک، وەزیری دەرەوەی ئەڵمانیا لە هەولێر کۆبوونەوە و لە کۆنفرانسێکی رۆژنامەوانیدا ناوەڕۆکی کۆبوونەوەکەیان خستەڕوو.
لەسەرەتای کۆنفرانسە رۆژنامەوانیەکەدا ئانالێنا بێربوک، وەزیری دەرەوەی ئەڵمانیا سوپاسی سەرۆکی حکومەتی هەرێمی کوردستانی کرد و گوتی: "خۆشحاڵم کە ئەمڕۆ بە دیداری یەکتر گەیشتین و ئاڵوگۆڕی بیروڕامان کرد، من لە سەرەتاوە دەمەوێت لە دڵەوە سوپاستان بکەم، لە بەرامبەر کۆمەک و هاوکاریتان بۆ لێقەوماوانی بوومەلەرزەکەی تورکیا، یەکێک لەو دراوسێیانەی لە بارودۆخێکی ئەمنی تونددا هاوکاری تورکیای کرد لەسەر ئاستی جیهان هەرێمی کوردستان بوو، ئەمەش دەنگدانەوەی هەبوو. هەروەها نزیکەی یەک ملیۆن ئاوارە کە لە ترسی داعش رایانکردووە لێرە لە هەرێمی کوردستانی عێراق دەژین، هاوکات سەدان هەزار هاووڵاتی سووری بەهۆی شەڕی ناوخۆی وڵاتەکەیان زێدی خۆیان جێهێشتووە ئێرە بووەتە پەناگەیان، بۆ ئەم کارە گەورە رێز و پێزانینی زۆرمان بۆ ئێوە هەیە".
وەزیری دەرەوەی ئەڵمانیا، گوتیشی: "لە ساڵی 2014ـەوە ئێمە نزیکەی 800 ملیۆن یۆرۆمان لە ئەڵمانیاوە بۆ ئێرە تەرخان کردووە، دەمانەوێت رۆڵی خۆمان لە هەرێمی کوردستان درێژە پێبدەین.
راشیگەیاند: "بەشێک لەو کەسانەی هەرێمی کوردستان بووەتە پەناگەیان خەڵکی ئێزدین، بیستمان کە کەمپی ئاوارەکان دادەخرێن، بە بڕوای ئێمە دەبێ ئەوە بە پلانێکی ورد جێبەجێ بکرێت، بۆ ئەوەی جارێکی دیکە ژن و منداڵان ئاوارە نەبن و لە شوێنێکی نائارام دا ژیان بەسەر نەبەن. ماوەیەک لەمەوبەریش تاوانەکانی داعش دژی ئێزدییەکان بە جینۆساید ناساند".
ئانالێنا بێربوک، راشیگەیاند: هێشتا مەترسییەکانی داعش بەردەوامن، ئێمەش پشتیوانی خۆمان لە رووبەڕووبوونەوەی داعش بۆ ئێوە دووپات دەکەینەوە و مەشق و را‌هێنانی هێزەکانی ئەڵمانیا لەگەڵ پێشمەرگە لێرە بەردەوامە، لە حەوت ساڵی رابردوو ئەڵمانیا 50 ملیۆن یۆرۆی تەرخان کردووە".
ئاماژەی بەوەشدا: "هەولێر ناوەندێکی گرنگی وەبەرهێنان و ئاڵوگۆڕی کولتووری ئەڵمانیا – عێراقییە، پەیمانگەی گۆتە DAAD لێرە نوێنەرایەتیان هەیە و لە حەوت قوتابخانە لە هەرێمی کوردستان زمانی ئەڵمانی دەخوێندرێت، چەند هەفتەیەکی لەمەوبەریش بەردی بناغەی ئینستیوتی کولتووری ئەڵمانی – فەرەنسی لێرە دانراوە، ئەم ئاڵوگۆڕەش پەیوەندییەکانمان بەرەو پێش دەبەن".
وەزیری دەرەوەی ئەڵمانیا، گوتی: "هەماهەنگی لەنێوان هەموو بەشەکانی عێراق گرنگە بەتایبەتی لەنێوان هەولێر و بەغدا، بۆیە ئێمە کاتێک پڕۆژەمان لێرە دەبێت ئەوەمان لەبەرچاوە".
مەسرور بارزانی، سەرۆکی حکومەتی هەرێمی کوردستان رایگەیاند: "بەناوی خەڵکی هەرێمی کوردستانەوە سوپاستان دەکەم بۆ بە جینۆسایدناساندی ئێزدییەکان، کە بێگوومان ئەمە هاوکارییەکی زۆر بوو لە ناساندی ئەو تاوانەی دەرحەق بە خوشک و برا ئێزدییەکانمان کرا. هیوادارم وڵاتانی دیکەی جیهانیش چاو لە ئەڵمانیا بکەن، بۆ ئەوەی نەک تەنیا بەجینۆسایدناسندنی ئەم کۆمەڵکوژییە بکرێت، بەڵکو بۆ ئەوەی لە ئاوەدانکردنەوە و هاوکاریکردنی شنگال و خوشک و برا ئێزدییەکان بەشداری بکەن".
مەسرور بارزانی، ئاماژەی بەوەشدا: "کە ئەڵمانیا یارمەتییەکی زۆری هەرێمی کوردستانی دا لە تێكشکاندنی تیرۆریستانی داعش.
تەوەرێکی دیکەی کۆبوونەوەکە، پتەوکردنی دیموکراسیەت و جێبەجێکردنی یاسا و رووبەڕووبوونەوەی تیرۆریزم بووە بە هەموو جۆرەکانییەوە.
سەرۆکی حکومەتی هەرێمی کوردستان ئەوەشی خستەڕوو، لە کۆبوونەوەکدا باسی چەند خاڵێكی دیکەشیان کردووە لەوانە، هەوڵدان بۆ باشترکردنی ژیانی خەڵک و پتەوکردنی پەیوەندییەکان لەگەڵ وڵاتانی دۆست بەتایبەتی وڵاتی ئەڵمانیا لەسەر بنەمای بەرژەوەندی خەڵکی هەرێمی کوردستان.
مەسرور بارزانی، باسی لەوەشکرد، لە کۆبوونەوەکەدا داوای لە حکومەتی ئەڵمانیا کرد زیاتر یارمەتی حکومەتی هەرێم بدەن، بۆئەوەی بتوانین پەرە بە کەرتی ئابووری هەرێمی کوردستان بدەن، کە کاریگەری راستەوخۆی لەسەر سەقامگیری ناوچەکە دەبێت.
سەبارەت بەو ئافرەتە ئێزدییانەی کە بوونەتە قوربانی دەستی تیرۆر و ئێستا هەندێکیان بوونەتە خاوەن منداڵ، سەرۆکی حکومەتی هەرێمی کوردستان گوتی، "هیوادارین کۆمەڵگەی ئێزدی باوەشیان بۆ بکەنەوە و تێکەڵی خێزانەکانیان ببنەوە".
مەسرور بارزانی راشیگەیاند، ئەگەریش لەڕووی کولتوورییەوە رێگەی گەڕاناوەیان پێنەدرا حکومەتی هەرێمی کوردستان ماڵی گەورەی ئەوانە و لەڕووی دابینکردنی ئاسایش و بژێوی ژیان و بەخێوکردنی منداڵان، ئێمە بەردەوام دەبین لە هاوکاری کردنیان.
مەسرور بارزانی سەرۆکی حکومەتی هەرێمی کوردستان، لە وەڵامی پرسیارێکی پەیامنێری کوردستان24 لەبارەی پڕۆژەی بە ئەلیکترۆنیکردنی کاروبارەکانی حکومەت و هاوکاری ئەڵمانیا لەوبارەوە، گوتی: "لە گفتوگۆمان لەگەڵ وەزیری دەرەوەی ئەڵمانیا باسی ئەوەمان کرد، کە چۆن بتوانین پەرە بە پەیوەندییەکانمان بدەین، هەر بۆ زانیاریتان یەکەم پڕۆژەی بە ئەلیکترۆنی کردنی حکومەت لەگەڵ کۆمپانیایەکی ئەڵمانی بووە، لەلایەن وەزارەتی ناوخۆ بۆ دەرهێنانی مۆڵەتی لێخوڕینی ئۆتۆمبێل، ئەمە یەکەم هەنگاو بووە بۆ بە ئەلیکترۆنی کردنی کارەکان، لەگەڵ بەڕێز وەزیر قسەمان کردووە کە هەردوولامان بتوانین پەیوەندییەکی پتەوتر دروست بکەین، بۆ ئەو پێداویستیانەی ئێمە پێویستمان پێیانە ئەوانیش لەو روانگەیەوە هاوکاریمان بکەن".