"نیوه‌ی خه‌ڵكی سووریا له‌ژێر هه‌ڕه‌شه‌ی برسیه‌تی دان"
K24 - هەولێر:
رێکخراوی خۆراکی جیهانی نەتەوە یەکگرتووەکان لە راگه‌یێندراوێكدا، ئاماژەی بەوەکرد، له ئێستادا تێکڕای مووچەی مانگانە لە سووریا تەنها چارەکێک لە پێداویستی خۆراکی خێزانەکە دەگرێتەوە، ئه‌مه‌ش پێویستی به زیادکردنی به‌په‌له‌ی هاوکارییە مرۆییەکانه.
له‌راگه‌یێندراوه‌كه‌شدا هاتووه، نزیکەی 12.1 ملیۆن کەس واتە زیاتر لە سەدا 50ی دانیشتووان، لە ئێستادا بەدەست ئاسایشی خۆراکییەوە دەناڵێنن و 2.9 ملیۆن کەسی دیکەش مەترسی برسیه‌تی لەسەرە هه‌روه‌ها، دوایین داتاکان دەریدەخەن کە بەدخۆراکی "لە هەڵکشاندایە، ڕێژەی کەمبوونەوەی منداڵان و بەدخۆراکی دایکان دەگاتە ئاستێکی بێ وێنە".
کێن کرۆسلی، بەڕێوەبەری بەرنامەی خۆراکی جیهانی لە سوریا دەڵێت: "سووریه‌كان بە شێوەیەکی سەرنجڕاکێش خۆڕاگرن، بەڵام کۆمەڵێک شت هەیە کە مرۆڤەکان بەرگەی بگرن، بۆردومان، ئاوارەبوون، گۆشەگیری، وشکەساڵی، داڕمانی ئابووری و ئێستا بوومەلەرزە بە ڕێژەیەکی سەرسوڕهێنەر".
هه‌ر له راگه‌یێندراوه‌كه‌شدا هاتووه، کە بوومەلەرزەکانی 6ی شوباتی رابردوو، بەرزبوونەوەی نرخی خۆراک لە سووریا دوو هێندە زیادی کردووە.
رێکخراوی خۆراکی جیهانی ئه‌وه‌شی راگه‌یاند، بوومەلەرزەکانی ئەم دواییە پێویستی به زیادکردنی یارمەتییە مرۆییەکانه لە سووریا، نەک تەنها بۆ ئەو کەسانەی کە بەهۆی بوومەلەرزەکەوە زیانیان بەرکەوتووە بەڵکو بۆ ئەو کەسانەی کە لە ئێستاوە بەدەست بەرزبوونەوەی نرخی خۆراک و قەیرانی سووتەمەنیه‌وه دەناڵێنن، ئاماژەی بەوەشکرد، لە هەندێک ناوچەی سووریا رێژەی کەمبوونەوە منداڵ گەیشتووەتە 28%، بەدخۆراکیش لە نێو دایکاندا لە باکووری خۆرهەڵاتی سوریا گەیشتووەتە 25%.
سووریا سەردەمانێک لە بەرهەمهێنانی خۆراکدا خۆبژێوی بوو، به‌ڵام له ئێستادا لە ریزبەندی ئەو شەش وڵاتەدایە کە زۆرترین رێژەی نائاسایشی خۆراکیان هەیە لە جیهاندا و پشتبەستنێکی زۆریان بە هاوردەکردنی خۆراکەوە هەیە هه‌روه‌ها بەرهەمی گەنم لە سوریا بە ڕێژەی لەسەدا 75 کەمکردووەتەوە.
رێكخراوی خۆراکی جیهانی هاوکاری خۆراکی پێشکەش بە 5.5 ملیۆن کەس لە سەرانسەری سووریا دەکات، بەڵام له ئێستادا قەیرانی دارایی رووبەڕووی ئەو رێكخراوه بووەتەوە لە سووریا، ده‌شڵێت، پێویستی بە لانیکەم 450 ملیۆن دۆلار هەیە بۆ بەردەوامبوون لە هاوکارییەکان.