دوای بارانبارین شەپۆڵێکی خۆڵبارین رووی لە عێراق کردووە

خۆڵبارین
خۆڵبارین

K24 – هەولێر:

شه‌پۆلێكی به‌هێزی خۆڵبارین پارێزگای ئه‌نباری گرته‌وه‌ و نه‌خۆشخانه‌كانیش خراونه‌ته‌ حاڵه‌تی ئاماده‌باشی، هەروەها ئەو شەپۆڵە خۆڵبارینە گەیشتە پارێزگاکانی بەغدا و سەڵاحەددین.

ئاژانسی هه‌واڵی عێراقی "واع" رایگه‌یاند شه‌پۆڵێكی به‌هێزی خۆڵبارین چه‌ند ناوچه‌یه‌كی پارێزگای ئه‌نباری گرته‌وه‌ و به‌هۆی چڕی شه‌پۆڵه‌كەوەش،‌ مه‌ودای بینین زۆر كه‌مبووه‌ته‌وه‌، به‌ڕێوه‌به‌رایه‌تی ته‌ندروستی ئه‌نباریش سه‌رجه‌م نه‌خۆشخانه‌كانی خستووه‌ته‌ حاڵه‌تی ئاماده‌باشی و داواش له‌ هاووڵاتییان ده‌كات له‌ماڵه‌كانیان نه‌چنه‌ ده‌ره‌وه‌.

به‌گوێره‌ی میدیا عێراقییه‌كان، شه‌پۆڵه‌كه‌ له‌ بیابانه‌كانی رۆژئاوا عێراق و وڵاتی ئوردنه‌وه‌ هه‌ڵیكردووه‌ و به‌هۆی ئه‌وه‌ی ئاراسته‌ی با روو له‌ ڕۆژهه‌ڵاته‌، چاوه‌ڕێ ده‌كرێت ئەو شەپۆڵە خۆڵبارینە پارێزگاكانی ناوه‌ڕاست و باشووری عێراقیش بگرێته‌وه‌.

هەروەها سەر لە ئێوارەی ئەمڕۆ هەینی، ئەو شەپۆڵە خۆڵبارینە گەیشتە پارێزگاکانی بەغدای پایتەخت و سەڵاحەددین.

ئه‌مه‌ش له‌كاتێكدایه‌، دوو رۆژ به‌ر له‌ ئێستا ده‌سته‌ی كه‌شناسی عێراقی پێشبینیی بارانبارین و ئه‌و شه‌پۆڵه‌ خۆڵبارینه‌ی كردبوو، ئه‌مه‌ش جیاواز له‌ هه‌رێمی كوردستان، كه‌ له‌ شه‌وی رابردووه‌وه‌ بارسته‌هه‌وایه‌كی ساردی جه‌مسه‌ریی رووی تێكردووه‌‌ و شه‌پۆلێكی به‌فر و بارانبارین ناوچه‌ جیاوازه‌كانی هه‌رێمی كوردستانی گرتووه‌ته‌وه‌.