وەزارەتی دەرەوەی ئێران: ھەژموونی ئەمەریكا لە ناوچەکە بەرەو كۆتایی دەچێت
K24 - هەولێر:
گوتەبێژی وەزارەتی دەرەوەی ئێران دەڵێ ھەژموونی ئەمەریكا لە ناوچەکە بەرەو كۆتایی دەچێت، بەڵام ئەوان دەیانەوێت بە هێنانی فڕۆکەی شەڕکەر و چەکی زیاتر بۆ ناوچەکە، شکستەکانی خۆیان بشارنەوە.
ناسر كەنعانی، گوتەبێژی وەزارەتی دەرەوەی ئێران لە تویتێكدا رایگەیاند، واشنتن دەبێت راستییەكان وەك خۆی ببینێت و خۆی لە دەستێوەردان لە كاروباری رۆژھەڵاتی ناوەراست و رۆژئاوای ئاسیا ببوێرێت.
بەگوتەی كەنعانی، ھێنانی چەکی قورس و فڕۆكەی شەڕكەری زیاتر لەلایەن ئەمەریكا بۆ رۆژھەڵاتی ناوەڕاست و رۆژئاوای ئاسیا یارمەتی واشنتن نادات و ھەمووی بۆ سەرپۆشكردنی شكستەكانی ئەو وڵاتەیە.
كەنعانی باس لەوە دەکات، کە ھەژموونی ئەمەریكا لە جیھان بەرەو كۆتایی دەچێت.