سەرۆکوەزیران مەسرور بارزانی لەگەڵ فەرماندەی هێزەکانی ئیتاڵیا لە عێراق و هەرێمی کوردستان کۆبووەوە
K24 - هەولێر:
ئەمڕۆ مەسرور بارزانی، سەرۆکوەزیرانی هەرێمی کوردستان پێشوازی لە کۆلۆنێل دانێیلێ پیزانی فەرماندەی هێزەکانی ئیتاڵیا لە عێراق و هەرێمی کوردستان کرد کە بە بۆنەی کۆتاییهاتنی ئەرکەکانی سەردانی کردبوو.
لە دیداری سەرۆکوەزیرانی هەرێمی کوردستان و کۆلۆنێل دانێیلێ، کۆلۆنێل ستێفانۆ سلڤادۆری، فەرماندەی نوێی هێزەکانی ئیتاڵیا لە عێراق و هەرێمی کوردستان ئامادەبوو.
سەرۆکوەزیران مەسرور بارزانی سوپاسی ئیتاڵیای کرد بۆ هاریکاری و پشتگیریکردنی هەرێمی کوردستان و هیوای سەرکەوتنی بۆ فەرماندەی پێشوو خواست لە ئەرکی داهاتوویدا و پیرۆزبایی دەستبەکاربوونیشی لە فەرماندەی نوێی هێزەکانی ئیتاڵیا لە عێراق و هەرێمی کوردستان کرد.
بە گوێرەی راگەیەندراوێکی حکومەتی هەرێمی کوردستان، تەوەری سەرەکی دیدارەکە، گفتوگۆکردن بووە لە بارەی پەرەپێدانی پەیوەندییەکانی هەرێمی کوردستان و ئیتاڵیا و چاکسازییەکانی وەزارەتی پێشمەرگە .
ئاماژە بەوەشدرا، شاندی سەربازی ئیتاڵی جەختی لە بەردەوامبوونی پشتیوانیی وڵاتەکەی و هێزەکانی هاوپەیمانان بۆ هێزی پێشمەرگە، بە تایبەتی لە بواری راهێنان کردەوە.