عەمار حەکیم: تاوانی ئەنفال تائێستاش دڵەکان رادەچڵەکێنێت

عەمار حەکیم
عەمار حەکیم

K24 – هەولێر:

ئەمڕۆ 35 ساڵ بەسەر شاڵاوی ئەنفال تێدەپەڕێت کە رژێمی بەعس دژی کورد ئەنجامی دا، سەرۆکی رەوتی حیکمەی نیشتمانیش رایدەگەیەنێت، تاوانی ئەنفال ئەو تاوانە بوو کە تائێستاش دڵەکان رادەچڵەکێنێت.

عەمار حەکیم، سەرۆکی رەوتی حیکمەی نیشتمانی ئەمڕۆ هەینی (14ـى نيسان/ ئێپڕڵی 2023) لە تویتێکدا رایگەیاند، "سەرەڕای تێپەڕینی 35 ساڵ بەسەر تاوانی ئەنفالدا، بەڵام تا ئێستا تاڵی و ئازارەکانی ئەم تاوانە کە نزیکەی 180 هەزار کوردی بێتاوانی لە کوردستانی خۆشەویست کردە قوربانی، لە دڵی گەلی عێراق و ویژدانی مرۆڤایەتی سارێژ نەبووە، بەڵکو تائێستاش دڵەکان رادەچڵەکێنێت".

سەرۆکی رەوتی حیکمەی نیشتمانی داوایەکیش ئاراستەی هەموو لایەنەکان دەکات و ئاماژە بەوەدەکات، "لەم یادەوەرییە بە ئازارە داوادەکەم بۆ چارەسەرکردنی کێشەکان پەنا ببرێتە بەر دیموکراسی، بۆ ئەوەی هەرگیز ئەم رووداوانە دووبارە نەبنەوە  و نەوەکانی داهاتوو هەمان ئازاریان بەسەردانەیەت".