شاخەوان عەبدوڵڵا: لێکتێگەشتنمان لەگەڵ بەغدا مانای ئەوە نییە خاکمان داگیربکەن و ئێمەش بێدەنگ بین

شاخەوان عەبدوڵڵا، جێگری سەرۆکی ئەنجوومەنی نوێنەرانی عێراق
شاخەوان عەبدوڵڵا، جێگری سەرۆکی ئەنجوومەنی نوێنەرانی عێراق

K24 – هەولێر:

جێگری سەرۆکی ئەنجوومەنی نوێنەرانی عێراق رایگەیاند لێکتێگەیشتنی باشمان لەگەڵ بەغدا مانای ئەوە نییە کە لەئاست داگیرکردن و پەلاماردانی جووتیارانی کورد بێدەنگبین و گوتیشی، راکان جبووری، پارێزگاری بەزۆر سەپێندراوی کەرکووک خۆی کەسێکی گەندەڵە و هەمیشە هەوڵی دووبەرەکی دەدات لە کەرکووک و دەشڵێت: "نووسراوی راکان جبووریم راگرتوە لە رێگەی بەغداوە، کە هەوڵی دابوو ماڵە کوردەکان دەربکات و عەرەبی هاوردە لە شوێنیان نیشتەجێبکات".

ئەمڕۆ یەکشەممە (23ـی نیسانی/ئێپڕڵی 2023)، شاخەوان عەبدوڵڵا، جێگری سەرۆکی ئەنجوومەنی نوێنەرانی عێراق، لەمیانەی بەشداریکردنی لە ژووری هەواڵی کاتژمێر هەشتی کوردستان24 رایگەیاند، ئەو کێشانەی ماوەی رابردوو لە گوندی پەڵکانەی شاری کەرکووک چارەکراوە، بەڵام چارسەرەکە کاتییە تا کاتی هەڵوەشاندنەوەی بڕیاری قیادەی سەورە.

جێگری سەرۆکی ئەنجوومەنی نوێنەرانی عێراق راشیگەیاند: "پرسی هاتنی عەرەبی هاوردە لە دوای رووداوی 16ـی ئۆکتۆبەرەوە سەریهەڵداوە و تاوەکو ئەم چەند رۆژەی رابردووش بەردەوام بوو، بۆیە دەبێت ئێمە هەمیشە لەسەر هێل بین بۆ ئەوەی کە نەهێڵێین دەستبەسەر زەوی هاووڵاتییانی کوردا بگیرێت".

شاخەوان عەبدوڵڵا باسی لەوەشکرد، لەسەر بابەتی خاک، سەرۆک بارزانی هەمیشە خۆی لەسەر هێلە پێشتریش پەیامی دابوو بە عادل عەبدولمەهدی سەرۆکوەزیرانی پێشووتری عێراق، کە رێگەنادات دەستدرێژی بکرێتە سەر موڵک و ماڵی هاووڵاتییانی کورد لەو ناوچانە.

هەروەها ئاماژەی بەوەشکرد، دوێنێ مەسرور بارزانی، سەرۆکی حکومەتی هەرێمی کوردستان، لە بەیاننامەیەکدا جەختی  لەسەر هەمان خاڵی سەرۆک بارزانی کردەوە کە رێگەنادرێت دەستدرێژی بکرێتە موڵک و ماڵی هاووڵاتییانی کورد.

جێگری سەرۆکی ئەنجوومەنی نوێنەرانی عێراق، سەبارەت بە لێکتێگەشتنی هاوبەشی نێوان هەرێم و عێراق گوتی: "ئێمە لەگەڵ یەکتردا رێککەوتن و لێکتێگەشتن لە نێوانماندا هەیە، بەڵام ئەمە بەمانای ئەوە نییە خاکمان داگیربکەن و ئێمەش بێدەنگ بین، لەسەر مافی هاووڵاتییانی خۆمان هەمیشە لەسەر هێلین".

شاخەوان عەبدوڵڵا، گوتیشی، لەگەڵ محەممەد شیاع سوودانی، سەرۆکوەزیرانی عێراق، قسەمکردووە، بەڵێنی داوە کێشەکانی پەڵکانە بە زووترین کات چارەسەربکات و گوتی ناهێڵین دەستدرێژی بکرێتە سەر خاک و ماڵی جووتیارانی کورد.

لەبارەی راکان جبووری پارێزگاری سەپێندراوی کەرکووک، جێگری سەرۆکی ئەنجوومەنی نوێنەرانی عێراق گوتی: "راکان جبووری کەسێکی گەندەڵە و هەمیشە هەوڵی دووبەرەکی دەدات لە کەرکووک، هەروەها نووسراوی راکان جبووریم راگرتوە لە رێگەی بەغداوە، کە هەوڵی دابوو ماڵە کوردەکان دەربکات و عەرەبی هاوردە لە شوێنیان نیشتەجێبکات".

سەبارەت بە پرسی هەناردەکردنەوەی نەوتی هەرێمی کوردستان بۆ بەندەری جەیهان لەرێگەی کۆمپانیای سۆمۆوە، شاخەوان عەبدوڵڵا، رایگەیاند، ئەو خاڵانەی کە لە لایەن تورکیاوە هاتووە، حکومەتی عێراق قبوڵیکردووە و جێبەجێکردووە و فەرمانی دەرکردووە بە دووبارە هەناردەکردنەوەی نەوت.

جێگری سەرۆکی ئەنجوومەنی نوێنەرانی عێراق، راشیگەیاند، دەستپێنەکردنەوەی هەناردەکردنی نەوت زیانێکی زۆر لە حکومەتی عێراق دەدات، چونکە حکومەتی عێراق دەکەوێتە نێوان بۆشاییەکی یاسایی لەگەڵ هەرێم کە پێویستە پابەندبێت بە ناردنی شایستە داراییەکانی هاووڵاتییانی هەرێمی کوردستان.

شاخەوان عەبدوڵڵا، ئاماژەی بەوەشکرد، کێشەکان چارەسەرکراوە تەنیا رێکاری هەناردەکردن ماوە، بڕیار دەرچووە و رێکارە تەکنیکییەکانیش تەواوبوونە، بۆیە پێشبینی کرد، دوای جەژن هەناردەکردنەوەی نەوتی هەرێمی کوردستان دەستپێبکاتەوە.

جێگری سەرۆک پەرلەمانی عێراق، گوتیشی :"بە فەرمی دوای جەژن دەبێت سەرۆکوەزیرانی عێراق مووچەی مانگێک بە تەواوی بنێرێت بۆ فەرمانبەرانی هەرێمی کوردستان، چونکە حکومەتی عێراقە بەرپرسە لە راگرتنی هەناردەکردنی نەوت، دەشبێت خۆشی چارەسەریبکات".