بەرەی تورکمانی: ئێمە ئاستەنگ نین لەبەردەم ئەنجامدانی هەڵبژاردن

هیمداد سەباح، سەرۆکی فراکسیۆنی بەرەی تورکمانی
هیمداد سەباح، سەرۆکی فراکسیۆنی بەرەی تورکمانی

K24 – هەولێر

سەرۆکی فراکسیۆنی بەرەی تورکمانی رایدەگەیەنێت، ئەوان نابنە ئاستەنگ کەبەردەم هەڵبژاردنی داهاتووی پەرلەمانی کوردستان، بەڵکو لەگەڵ ئەنجامدانی هەڵبژاردنن لەکاتی دیاریکراودا.

هیمداد سەباح، سەرۆکی فراکسیۆنی بەرەی تورکمانی لە پەرلەمانی کوردستان لەمیانی بەشداریکردنی لە گەشتێکی هەواڵەکانی کوردستان24 رایگەیاند، وەکو پێکهاتەکان لە کوردستان نابنە کێشە و ئاستەنگ لەبەردەم پرۆسەی دیموکراسی.

گوتیشی: "وەکو بەرەی تورکمانی لەگەڵ ئەوەداین هەڵبژاردنی پەرلەمانی کوردستان لەکاتی دیاریکراودا ئەنجامبدرێت، هەروەها پێکهاتەکان خۆیان بڕیار لە چارەنووسی خۆیان بدەن و لایەنەکانی دیکە لەجیاتی ئێمە بڕیار بدەن".

سەرۆکی فراکسیۆنی بەرەی تورکمانی، دەڵێت: "لە هەرێمی کوردستان پێکهاتەکان نەبوونەتە کێشە، هەندێک لایەنی سیاسی ئەگەر کێشەی ناوخۆیان هەیە، نابێ واپیشانی خەڵکی بدەن کە پێکهاتەکان کێشەن، ئێمەش تێبینیمان لەسەر هەندێک یاسا و ئەدای هەندێک پەرلەمانتار هەیە، بەڵام ئەوەمان نەکردووەتە کێشە".

دەشڵێت: "داوا لەو لایەنانە دەکەین کێشە و گرفتەکانی ناوخۆیان چارەسەر بکەن، بۆ ئەوەی پەرلەمانی کوردستان دانیشتنەکانی دەستپێبکاتەوە، تا بتوانین یاسای هەڵبژاردن هەموار بکەینەوە و کۆمسیۆنی هەڵبژاردنەکان و راپرسی لە هەرێمی کوردستان کارا بکرێتەوە".

لەبارەی بۆچوونی پێکهاتەکان لەبارەی شێوازی هەڵبژاردنی داهاتوو، هیمداد سەباح، گوتی: "وەک بەرەی تورکمانی ئێمە لەگەڵ یەک بازنەیین، پێمان باش نییە پێکهاتەکان دابەشی سەر پارێزگاکان بکەن و بە یەک بازنە بەشداری لە هەڵبژاردنەکان بکەن، هیچ کاتیش لەگەڵ کەمکردنەوەی کورسی پێکهاتەکان نین".

باسی لەوەشکرد: "لە کۆبوونەوەکانمان لەگەڵ نەتەوە یەکگرتووەکان جەختمان لەوەکردەوە کە لە دەنگدانی تایبەت تەدەخولی پێکهاتەکان نەکرێت و یەک بازنە بێت".

ئاماژەی بەوەشدا: "داواکاری ئێمە ئەوەیە بە زووترین کات کۆمسیۆنی هەڵبژاردنەکان کارا بکرێتەوە، پێشتر نوێنەری تورکمان لە کۆنسیۆن هەبوو ئێستا شوێنەکەی چۆڵە، دەمانەوێت لەناوخۆماندا ئەو نوێنەرە هەڵبژێرین و پۆستە پڕبکەینەوە".