محه‌ممه‌دی حاجی مه‌حموود: ده‌بێت هه‌نگاوه‌كان به ئاراسته‌ی جێبه‌جێكردنی په‌یامه‌كه‌ی سه‌رۆك بارزانی بن
K24 - هەولێر:
سەرۆکی پارتی سۆسیال دیموكراتی كوردستان رایده‌گه‌یه‌نێت، په‌یامه‌كه‌ی سه‌رۆك بارزانی گرنگه و هه‌نگاونان بۆ جێبه‌جێكردنیشی گرنگه، هاوكات رێوڕه‌سمی كردنه‌وه‌ی یادگه‌ی نیشتمانی بارزانی به رۆژێكی مێژوویی بۆ كوردستان ناو ده‌بات.
له‌باره‌ی گرنگی په‌یامه‌كه‌ی سه‌رۆك بارزانی، محه‌ممه‌دی حاجی مه‌حموود، سەرۆکی پارتی سۆسیال دیموكراتی كوردستان لێدوانی بۆ كوردستان24 دا و جه‌ختیكرده‌وه، په‌یامه‌كه‌ی سه‌رۆك بارزانی گرنگه و جێبه‌جێكردنیشی گرنگه. گوتیشی، په‌یامه‌كه گشتگیر بوو، به‌شێوه‌یه‌ك هه‌موو بابه‌ته‌كانی خستووه‌ته‌ڕوو و بۆچوونی خۆیشی له‌باره‌یه‌وه نیشانداوه.
هه‌روه‌ها ئاماژه‌ی به‌وه‌كرد، سه‌رباری ئه‌وه‌ی په‌یامه‌كه‌ی سه‌رۆك بارزانی گرنگی خۆی هه‌یه، به‌ڵام ده‌بێت هه‌نگاوه‌كان به ئاراسته‌ی گرتنه‌به‌ری میكانیزمه‌كانی جێبه‌جێكردنی په‌یامه‌كه بن.
سەرۆکی پارتی سۆسیال دیموكراتی كوردستان له به‌شێكی دیكه‌ی لێدوانه‌كه‌یدا بۆ كوردستان24 له‌باره‌ی كردنه‌وه‌ی یادگه‌ی نیشتمانی بارزانی، رایگه‌یاند، ئه‌مڕۆ بۆ كوردستان رۆژێكی مێژووییه. گوتیشی، دروستكردنی یادگه‌ی له‌م شێوه‌یه گرنگه بۆ نیشاندانی خه‌بات و قوربانیدان و تێكۆشانی بارزانی له‌پێناو رزگاركردنی گه‌له‌كه‌ی.
سەرۆک مەسعود بارزانی لەمیانی گوتارێکیدا لە رێورەسمی کردنەوەی یادگه‌ی نیشتمانی بارزانی، داوای لە لایەنە سیاسییە کوردییەکان کرد، بۆ دۆزینەوەی چارەسەر بۆ کێشەکانی ناوچەکە، پێش 18ـی ئەم مانگە، کۆبووەوەیەکی گەورە ساز بکەن.
سەرۆک بارزانی سەبارەت بە بانگەوازەکەی، رایگەیاند: پێش ئەم کۆبوونەوەیە داوا لە هەردوو مەکتەبی سیاسی پارتی و یەکێتی دەکەم، کۆبوونەوەیەک بکەن، تا ئەم تەمومژییە نەمێنێت و زەمینەسازی بۆ کۆبوونەوە گەورەکە بکەن.