سەنتەری ئاڵا رێوڕەسمێکی بۆ ناساندنی کتێبی "هەراسان بەسەرهاتی پێشمەرگەیەک" رێکخست
K24 - هەولێر:
سەنتەری رۆشنبیری ئاڵا رێوڕەسمێکی تایبەتی بۆ ناساندنی کتێبی "هەراسان بەسەرهاتی پێشمەرگەیەک" رێکخست، کە لە نووسینی هاوار بانیخێڵانیـیە و ناوەڕۆکی کتێبەکەش باس لە ژیان و بەرخودانی پێشمەرگە و ئازاری قارەمانانی نیشتمان دەکات.
ئەمڕۆ یەكشەممە (14ــی ئایاری 2023)،هاوار بانیخێڵانی، لە رێوڕەسمەکەدا باسی لە سەردەمی شاخ و ئازارەکانی لە ژیانی پێشمەرگایەتیدا کرد، هەروەها باسی رۆڵی کاریگەریی هاوڕێ پێشمەرگەکان و خەباتی بێوچانی ئەو هێزە کرد.
لە چوارچێوەی ئەم رێوڕەسمەدا حەمید قەڵادزەیی نووسەر و شاعیر و هاوڕێی نزیکی هاوار بنایخێڵانی، رامانێکی بۆ کتێبەکە کرد و بەشێک لە یادگارییەکانی ژیانی پێشمەرگە و چەند گرتەیەکی مێژوویی لە خەبات و تێکۆشانی پێشمەرگە خستەڕوو.
حەمید قەڵادزەیی، نووسەر و شاعیر، بە کوردستان24ــی راگەیاند، کتێبی (هەراسان بەسەرهاتی پێشمەرگەیەک)، گێڕانەوەی چیرۆکەکانی پێشمەرگایەتی هاوار بانیخێڵانیـە و گوزارشتە لە رووداوەکانی پێشمەرگایەتی و هەلومەرجە دژوارەکان و خۆڕاگری پێشمەرگە دەکات.
کتێبی هەراسان، لە 208 لاپەڕەی قەبارە مامناوەندی پێکهاتووە و تیراژی 1000 دانەیە، لەلایەن دەزگای ئینسکلۆپیدیای PDFچاپکراوە.