گرووپی جی حەوت لەسەر سەپاندنی سزای نوێ بەسەر رووسیادا رێککەوتن
K24 - هەولێر:
گروپی جی حەوت لەسەر سەپاندنی سزای نوێ بەسەر رووسیادا رێککەوتن و هەناردەکردنی هەموو خزمەتگوزاری و کەرەستە و تەکنەلۆژیایەکی وڵاتەکانیان بۆ رووسیا قەدەغە دەکەن.
گروپی جى حەوت لە راگەیاندراوێکی هاوبەشدا ئاشکرایکرد، رێککەوتوون لەسەر ئەوەی سزاکانی سەر رووسیا فراوانتر دەکەن و سزای نوێی ئابووری بەسەر مۆسکۆ بسەپێنن، هەروەها هەناردەی هەموو ئەو خزمەتگوزاری و کەرەستە و تەکنەلۆژیایانەی وڵاتانی جی حەوت بۆ رووسیا قەدەغە دەکەن، کە دەبنە پاڵپشتییەک بۆ جەنگ و پارەدارکردنی سوپاکەی.
ئاماژەی بەوەشدا، هەوڵەکانیان بۆ رێگریکردن لە خۆدزینەوەی مۆسکۆ لە سزاکانیان چڕتر دەکەنەوە و هەموو ئەو کۆمپانیایانەش سزا دەدەن، یارمەتی رووسیا دەدەن لە جەنگدا.
لەگەڵ دەستپێکردنی لوتکەی گروپی حەوت لە هیرۆشیما، لوتکەی چین و وڵاتانی ناوەڕاستی ئاسیاش بۆ بەهێزکردنی ئابووری و پەیوەندییە بازرگانییەکانیان دەستیپێکرد، شی جینپینگ سەرۆک کۆماری چین رایگەیاند، ، دەبێت بە هەموو شێوەیەک رووبەڕووی هەر دەستێوەردان و هەوڵێکی دەرەکی لە کاروباری ناوخۆی وڵاتەکانیان ببنەوە. ئاماژەی بەوەشدا، پێویستە هەماهەنگییەکانیان بۆ دروستکردنی رێگەی ئاوریشم چڕتر بکەنەوە.
سەرۆک کۆماری چین رایگەیاند، دەبێت بە هەموو شێوەیەک رووبەڕووی هەر دەستێوەردان و هەوڵێکی دەرەکی لە کاروباری ناوخۆی ولاتەکانیان ببنەوە.
لوتکەی چین و وڵاتانی ناوەڕاستی ئاسیا بۆ تاوەکو 20ی ئایار و بۆ ماوەی دوو رۆژ بەردەوام دەبێت، لوتکەکەش هاوکاتە لەگەڵ لوتکەی گروپی حەوت، کە یەکێک لە ئەجێنداکانی بریتییە لە پرسی چین و هەڕەشە و دەستێوەردانەکانی لە زەریای هێمن و گەرووی تایوان.
گروپی حەوت (G7)
ئەندام
7 وڵات + یەکێتی ئەوروپا
ئەمهریکا
کەنەدا
فەرەنسا
ئەڵمانیا
ئیتاڵیا
بەریتانیا
ژاپۆن
یەکێتی ئەوروپا
دامەزراندن
1973
یەکەم لوتکە
1975
ئامانج
سیاسی و ئابووری
ئابووری
تێکڕای بەرهەمی ناوخۆ
200 ترلیۆن دۆلار
تێکڕای بەرهەمی ناوخۆی جیهان
%30-%40
ژمارەی دانیشتووان
777,000,000 کەس
%10ی دانیشتووانی جیهان