موسەنا ئەمین: هەندێک لایەن بۆ ریکلامی سیاسی باسی پاشەکەوتی مووچە دەکەن

K24 - هەولێر

موسەنا ئەمین، رایدەگەیەنێت: هەندێک لایەن بۆ ریکلامی سیاسی باسی پاشەکەوتی مووچەی فەرمانبەران دەکەن، نەک بۆ گێرانەوە ئەو مافە بۆ فەرمانبەران.

موسەنا ئەمین، پەرلەمانتاری عێراق، لەمیانی بەشدایکردنی لە رووماڵی تایبەتی کوردستان24 لەبارەی گۆڕانکارییەکانی پشکی هەرێم لە بودجە و دەستبردن بۆ مافە دەستوورییەکانی هەرێمی کوردستان، رایگەیاند: "ئەو گۆڕانکاریانەی لە لیژنەی دارایی پەرلەمانی عێراق دەکرێن دوو جۆر گۆڕانکارین، یەکێکیان کۆتوبەند دروستکردنە لەسەر هەرێمی کوردستان و بۆ (ئەڵغام) مین دانانە لەناو یاسای بودجە و دروستکردنی پێچ و لۆچ دروستکردنە لە چۆنیەتی خەرجکردنی پارەی بودجە و ناردنی بەشە بودجەی هەرێمی کوردستان".

گوتیشی: "ئەو جۆرە دەستکاریانە لای ئێمە رەتکراونەتەوە، دەستبردن بۆ هەرێمی کوردستان هەندێک جار ئاماژەی هەڵوەشاندنەوەی قەوارەی هەرێمی تیایە، ئێمە بە هیچ شێوەیەک ئەو جۆرە گۆڕانکاریانەمان قبووڵ نییە و دژی دەوەستینەوە، پێمان وایە کە لە بەرژەوەندی خەڵکی کوردستان نییە، ئێمە لە بەغدا بەرگریکاری خەڵکی کوردستان، پێمان وایە ئەوەی دەکرێت کێشە دروستکردنە بۆ خەڵکی کوردستان".

موسەنا ئەمین، دەڵێ: "ئەو بودجەی بۆ هەرێمی کوردستان دیاری دەکرێت، پێویستە بە رێک و پێکی و راستەوخۆ بێت و گرێی بۆ دروست نەکرێت، نەخرێتە سندووقێکەوە کە بۆ وەرگرتنی هەموو جارێک واژۆی سەرۆکوەزیران و وەزیری دارایی عێراقی پێویست بێت، ئەمە گرێ دروستکردنە بۆ بەشە بودجەی هەرێم".

ئەو پەرلەمانتارە، ئەوەشی خستەڕوو: "گۆڕانکاری سیاسی زۆرن لە عێراق، ئەگەری ئەوە هەیە تەنگەژە دروست ببێت، کە ئەمەش دەبێتە هۆکاری نەناردنی بودجە، هەروەها بەستنەوەی ناردنی بەشە بودجە بە نەوت وەکو ئەوەی ئێمە لە بەرامبەر نەوت ئەو بەشە بودجە وەرگرین، نەک لەبەر ئەوەی بەشێکین لە عێراق، ئەوە مەبدەئێکە دەبێ روون بێت، ئەمەش هەڵەیە ئەگەر لە داهاتوودا بە هەر هۆکارێک هەناردەی نەوت وەستا لە بەغدا بودجە بۆ هەرێمی کوردستان نانێردرێ. مادام رێگەمان پێنادەن سەربەخۆبین دەبێ بەبێ مەرج بودجەمان لە عێراقەوە بۆ رەوانە بکرێت، ئێمە نەوت نافرۆشین بە عێراق، ئەگەر نەوتەکەمان هەناردە کرد پارەمان پێبدات ئەگەرنا نەیدات، نەوت دەبێ بەپێی یاسای نەوت و گاز رێک بخرێت، بۆ ئەوە دەبێ کۆمپانیای سۆمۆ بە هاوکاری حکومەتی هەرێم بیکات کاربکەن، بەڵام نابێ بودجە ببەسترێتەوە بە بودجەی هەرێمی کوردستان".

ئاماژەی بەوەشکرد: "بابەتێکی دیکە لەو گۆڕانکاریانە هەیە ئەویش گێڕانەوەی پاشەکەوتی مووچەیە بۆ فەرمانبەران، ئێمە بێ دوو دڵی لەگەڵ ئەو بابەتەین، هەروەها هاوتاکردنی مووچەخۆران هاوتا بکرێن لەگەڵ عێراق و دامەزراندنی فەرمانبەران دەستپێبکاتەوە وەکو عێراق، هەروەها قەرەبووکردنەوەی کەسوکاری ئەنفالکراوان و جینۆسایدکراوان، ئەم بودجەیەش بخرێتە سەر حکومەتی عێراق و بە یەکجاری ئەو کێشەیە چارەسەر بکرێت، هەروەها چارەسەرکردنی کێشەی مووچەی خانەنشین کراوان".

گوتیشی: "گێرانەوەی پاشەکەوت بۆ مووچەخۆران، ئەرکی هەردوو حکومەتە و دەبێ لەسەر ئەوە رێکبکەون کە چۆن بیدەنەوە، ئەگەر حکومەتی هەرێم باوەڕ بە حکومەتی فیدراڵی بکات، کە لە ئەنجامی نەناردنی بوجە ئەو کەڵەکە بوونە دروستبووە، بۆ ئەو مەبەستە ئێمەش هاوکار و پاڵپشت دەبین".

موسەنا ئەمین، دەشڵێت: "بەداخەوە هەندێک لایەنی سیاسی تەنها ئیشی پۆپۆلیستی و بازاڕگەرم کردن دەکەن، هێندەی مەبەستیان ریکلامی سیاسی هێندە مەبەستیان خزمەتی هاووڵاتییان نییە، ئەگەر بمەوێت پاشەکەوتی مووچە بۆ فەرمانبەران بگەڕێتەوە، نابێ ئیستفزازی پارتی و یەکێتی بکەین، بەڵکو دەبێ لە چوارچێوەیەک ئەو کارە بکەم کە فراکسیۆنەکانی دیکەش لەگەڵمان بن، پێکەوە بە هاوبەشی ئەو کارە بکەین، بەڵام ئەگەر من دەهۆڵ گەرم بکەم و گوێشم لەوە نەبێ کێ ئیستفزازی دەکەم، مانای وایە بەس گوێم لە ریکلام و پڕوپاگەندە سیاسییەکەیە، لە بری ئەوەی کەشێک دروستبکەم کە ئەو پاشەکەوتە بۆ فەرمانبەران بگەڕێندرێتەوە، بۆ ئەوەی بمەوێت پڕۆژەیەک سەربگرێت پێویستم بە هاوکاری و پاڵپشتی هەموو هێزە سیاسییەکانە".

گوتیشی: "هەندێک پێشنیار هەیە ختوکەی ویژدانی خەڵکە و دروستکردنی بازاڕی سیاسییە ئازاری خەڵکەوە، بەڵام لە واقیعدا جێبەجێ ناکرێ، ئێستا باسی ئەوە دەکرێ راستەوخۆ پارە لە حکومەتی عێراقەوە بدرێت بە پارێزگاکانی هەرێمی کوردستان، بەڵام ئەگەر حکومەتی هەرێم ئەوەی قبووڵ نەبێ لە دادگای فیدراڵی سکاڵا دەکات و هەڵیدەوەشێنێتەوە، بۆیە دەبێ بە واقیعی و ئەخلاقەوە سیاسەت بکەین بۆ چارەسەرکردنی کێشەکانی خەڵک، نەک ریکلامی سیاسی بۆ خۆمان یان حزبەکەمان، یان بۆ گەرمکردنی دەنگدەران بۆ هەڵبژاردن، بەداخەوە لە ئێستاوە تای هەڵبژاردن هەندێک لایەنی سیاسی گرتووە".

سەبارەت گواستنەوەی کێشەکانی ناوخۆی هەرێمی کوردستان بۆ بەغدا، ئەو پەرلەمانتارە گوتی: "بێگومان ناکۆکییەکانی هەرێم وا دەکات لە بەغداوە بڕیار لەسەر بابەتەکانی ئێمە بدرێت، بەڵام من گەشبینانە و واقعیانە و بەشێوەیەکی دەستووریانە لە هەندێک دەستوەردانی بەغدا دەکەم لە هەرێم".