خەلیل غازی: لایەنە سیاسییەکانی عێراق دەیانەوێت رێککەوتنی نێوان هەولێر و بەغدا شکست پێبهێنن

K24 - هەولێر:

ئەندامێکی لیژنەی دارایی لە پەرلەمانی عێراق، رایگەیاند، خواستی لایەنە سیاسییەکانی پەرلەمانی عێراق شکستپێهێنانی رێککەوتنی نێوان هەولێر و بەغدایە و بۆ ئەوەی لەو رێگەیەوە کابینەی حکومەتی سوودانی شکستی پێبهێندرێت.

خەلیل غازی، ئەندامی لیژنەی دارایی لە پەرلەمانی عێراق، تایبەت بۆ کوردستان24، رایگەیاند، لەگەڵ حکومەتی عێراق و هاوپەیمانی بەڕیوەبردنی دەوڵەت لەسەر پشکی هەرێمی کوردستان لە بودجەدا رێککەوتنکراوە، بەڵام دەستکاری کردنی بڕگەکانی ماددەی 13 و 14 بودجە پلانێک بوو دژی هەرێمی کوردستان.

هەروەها راشیگەیاند، چەند لایەنێکی توندڕەو لەڕێگەی دەستکاریکردنی بڕگەکانی ماددەی 13 و 14 دەیانەوێت دەسەڵاتی هەرێمی کوردستان لاوازبکەن، دایانویست کیانی هەرێمی  کوردستان نەمێنێت، هەروەها دەیانویست بەڕێوەبردنی کێڵگە نەوتییەکان لە دەستی هەرێمی کوردستان نەمێنێت.

ئەو ئەندامەی لیژنەی دارایی لە پەرلەمانی عێراق، ئاماژەی بەوەدا، لاینەکانی پەرلەمانی عێراق دەیانەوێت رێککەوتنی نێوان هەولێر و بەغدا شکست پێبهێنن، تا لەو رێگەیەوە کابینەی حکومەتەکەی محەممەد شیاع سوودانی، سەرۆک وەزیران، شکست بهێنێت.

باسی لەوەشکرد، لاینە شیعەکان و سووننەکان ناکۆکن لەسەر بڕە پارەی دیاریکراوە لە بودجەدا، هەر لایەنێک دەیەوێت پشکی زیاتری بودجە بەرخۆیان بکەوێت.

لەبارەی دانەوەی پاشەکەوتی مووچەی فەرمانبەرانی هەرێمی کوردستان، خەلیل غازی، گوتی: "ئێمە دوامان لە حکومەتی فیدراڵی کردوە  رێژەیەک لە بودجەدا تەرخانبکرێت بۆ دانەوەی پاشەکەوتی مووچەی فەرمانبەرانی هەرێمی کوردستان".

سەبارەت بە کۆبوونەوەی پەرلەمانی کوردتسنا لەسەر پرسی بودجە، ئەو ئەندامەی لیژنەی دارایی لە پەرلەمانی عێراق، رایگەیاند، هیچ کاتێک دیاری نەکراوە بۆ کۆبوونەوەی پەرلەمان لەسەر پەسنەکردنی پرۆژە یاسای بودجە.

هەروەها راشیگەیاند، لە ئێستادا کارەکانی لیژنەی دارایی پەرلەمان کۆتای پێنەهاتووە، چونکە ماددەی 13 و 14 ماوە جارێکی دیکە دابڕێژرێتەوە لە بەرژەوەندی خەڵکی هەرێمی کوردستان.

رۆژی (25ـی ئایاری 2023)، لیژنەی دارایی ئەنجوومەنی نوێنەرانی عێراق لە دوا کۆبوونەوەی خۆیدا لەبارەی گفتوگۆکردن و ئامادەکردنی کۆتا رەشنووسی پرۆژەیاسای بودجە بۆ دەنگدان لەناو هۆڵی ئەنجوومەندا، بە چەند گۆڕانکارییەکەوە هەردوو ماددەی 13 و 14ـی پرۆژەیاساکەی پەسەندکرد کە تایبەتن بە داهاتی نەوت و شایستە داراییەکانی هەرێمی کوردستان.

بەگوێرەی زانیارییەکانی کوردستان24، دوای ئەوەی چەند ئەندامێکی لیژنەی دارایی، پێشنیازێکی نوێ دەبەنە کۆبوونەوەکە و هەوڵی خستنە دەنگدانی دەکەن، نوێنەرانی پارتی و یەکگرتوو لە کۆبوونەوەکە دەکشێنەوە و چەند نوێنەرێکی سوننەش دەنگ بەو پێشنیازانە نادەن.

لەلایەن خۆیەوە، جەمال کۆچەر، ئەندامی لیژنەی دارایی لە ئەنجوومەنی نوێنەرانی عێراق بۆ کوردستان24 دووپاتیکردەوە، بەهۆی ئەوەی بەشێک لەو پێشنیازانە نوێ بوون و بواری ئەوەش نەدرا گفتوگۆیان لەبارەوە بکرێت کە دەقی پێشنیازەکانیش پێچەوانەی ناوەڕۆکی رێککەوتنی هەولێر و بەغدان مەترسی بۆ سەر بودجە و مووچەی هاووڵاتییانی هەرێمی کوردستان دروستدەکات، ئەوان لە کۆبوونەوەکە پاشەکشەیان کردووە.

لەبارەی ناوەڕۆکی کۆبوونەوەکەش، ئیخلاس دلێمی، جێگری سه‌رۆكی لیژنه‌ی دارایی له‌ په‌رله‌مانی عێراق زانیاری نوێی له‌ باره‌ی گۆڕانكارییه‌كانی پڕۆژه‌یاسای بودجه‌ و مادده‌كانی په‌یوه‌ست به‌ هه‌رێمی كوردستان بۆ کوردستان24 ئاشكراکرد و رایگەیاند، په‌رله‌مانتارانی یه‌كێتی و عه‌سائیب پێشنیازه‌كانیان كردووه‌ و له‌ كاتێكدا رێككه‌وتنی پێشوه‌خته‌ی له‌سه‌رنه‌كراوه‌ لەلایەن لیژنەکەوە بۆ گفتوگۆکردن و بڕیاردان.

زیاتر گوتی، "رۆژی پێنجشەممە کاتژمێر 9ـی شەو کۆبووینەوە و رێککەوتین، کە ماددەکانی پەیوەست بە هەرێمی کوردستان گفتوگۆیان لەبارەوە نەکرێت و دوابخرێن، بەڵام کە چووینە هۆڵی کۆبوونەوە بینیمان ماددەکان دەستکاریان کراوە و لەلایەن یەکێتی و عەسائیب ئەهلی حەق پێشکەشکراوه‌، ئێمە بەم گۆڕانکارییە شۆک بووین، نوێنەری یەکێتیش گوتی ئەمە پێشنیازی ئێمەیە و خوێندیانەوە، ئێمە رەخنەمان لە شێوازی پێشکەشکردنەكه‌ گرت بەوەی كه‌ رێککەوتنی پێشوەختەی لەسەر نییە و دەبوایە کۆپییەکیشی لەبەردەستی لیژنەی دارایی هەبوایە، کە هیچ یەكێکیان نەبوون".

رۆژی هەینی (26ـی ئایاری 2023)، حکومەتی هەرێمی کوردستان راگەیەندراوێکی بڵاوکردەوە کە تێیدا هاتووە، "ئەو گۆڕانکاریانەی لەلایەن بەشێک لە ئەندامانی لیژنەی دارایی ئەنجومەنی نوێنەرانی عێراق، لە رێکەوتی 2023/5/25 دژی هەرێمی کوردستان، لەسەر پرۆژەیاسای بودجە ئەنجام دران، نادەستوریین و دژی رێککەوتنی حکومەتی هەرێم و حکومەتی فیدراڵییە و هەروەها دژی پرەنسیپەکانی رێککەوتنی حکومەتی ئیدارەی دەوڵەت و بەرنامەی ئەو کابینەیەیە کە لە ئەنجوومەنی نوێنەران دەنگیان لەسەر دراوە".

حکومەتی هەرێمی کوردستان لە راگەیەندراوەکەدا جەختی لەسەر ئەوە کردووەتەوە، "بە هیچ شێوەیەک، ئەم ستەمکاری و پێشێلکردنەی مافەکانی خەڵکی کوردستان قبوڵ ناکەین و پابەندی هیچ بڕیارێکی تریش نابین جگە لەو رێککەوتنەی پێشتر لەگەڵ حکومەتی بەڕێز سوودانی کراوە".

هاوکات رۆژی هەینی (26ـی ئایاری 2023)، شاخەوان عەبدوڵڵا جێگری سەرۆکی پەرلەمانی عێراق تایبەت بە کوردستان24ی راگەیاند، لەسەر کۆبوونەوەی رۆژی شەممەی پەرلەمان رەزامەند نەبووم، هەربۆیە کۆبوونەوەکە بەڕێوەناچێت بۆ کاتێکی نادیار دواخرا.

رۆژی (13ـی ئادار/مارسی 2023)، ئەنجوومەنی وه‌زیرانی عێراق ره‌شنووسی پڕۆژه‌یاسای بودجه‌ی فیدراڵی په‌سه‌ندكرد، کە زیاتر لە 198 ترلیۆن دینارە و ئاماژەبەوەشکراوە، وەک بەشێک لە رێککەوتنی نێوان هەولێر و بەغدا، حکومەتی هەرێمی کوردستان رۆژانە دەبێت 400 هەزار بەرمیل نەوت بفرۆشێت.

درەنگانی شەوی چوارشەممە (5ـی نیسان/ئێپڕڵی 2023)، بە ئامادەبوونی 235 پەرلەمانتار پەرلەمانی عێراق خوێندنەوەی یەکەمی بۆ پڕۆژەیاسای بودجەی ساڵەکانی 2023 و 2024 و 2025 کرد.

هەروەها بە ئامادەبوونی 198 پەرلەمانتار دانیشتنی ژمارە (20)ـی ئەنجوومەنی نوێنەرانی عێراق بە سەرۆکایەتی محەممەد حەلبووسی و ئامادەبوونی هەردوو جێگرەکەی لە درەنگانی شەوی یەکشەممە (16ـی نیسان/ئێپڕڵی 2023) بۆ ئەنجامدانی خوێندنەوەی دووەم بۆ پرۆژەیاسای بودجە دەستیپێکرد بەڵام دوای خوێندنەوەی راپۆرتی لیژنەی دارایی، دانیشتنەکە هەڵگیرا بۆ رۆژی دواتر و درەنگانی شەوی دووشەممە کۆتاییهات.

لە (4ـی نیسانی 2023)، مەسرور بارزانی، سەرۆکی حکومەتی هەرێمی کوردستان لە (4ـی نیسانی 2023) هاوشانی محەممەد شیاع سوودانی، سەرۆکوەزیرانی عێراق ئامادەبوو لە رێورەسمی واژووکردنی رێککەوتنی نێوان هەولێر و بەغدا، کە نەخشەرێگای چارەسەربوو بۆ ناکۆکییە یاسایی و سیاسییەکانی نۆ ساڵی رابردوو لەبارەی هەناردەکردنی نەوتی هەرێمی کوردستان.