سبەی ئەردۆغان سەرۆک کۆماری تورکیا بۆ خولی سێیەمی خۆی سوێندی یاسایی دەخوات

K24 - هەولێر:

بەڕێوەبەری پەیوەندییەکانی تورکیا رایگەیاند، رەجەب تەیب ئەردۆغان، سەرۆککۆماری تورکیا رۆژی شەممە لە پەرلەمانی تورکیا سوێندی یاسایی دەخوات.

فەهرەتین ئاڵتون، بەڕێوەبەری پەیوەندییەکانی تورکیا رایگەیاند، سەرۆککۆماری تورکیا رۆژی شەممە لە پەرلەمانی تورکیا سوێندی یاسایی دەخوات و لە درەنگانی شەویشدا کابینەی نوێی حکومەتەکەی رادەگەیەنێت.

ئاماژەی بەوەشکرد، سەرۆک کۆمار میوانداری ئێوارە خوانێکیش دەکات بۆ سەرۆکەکانی وڵاتان کە بەشداری لە مەراسیمی دەستبەکاربوونی دەکەن.

رۆژی پێنجشەممە (1ـی حوزەیرانی 2023)، ئەحمەد یەنەر، سەرۆکی کۆمیسیۆنی باڵای هەڵبژاردنەکانی تورکیا ئەنجامی فەرمی و کۆتایی هەڵبژاردنی سەرۆکایەتی تورکیای ئاشکراکرد و رەجەب تەیب ئەردۆغان، کاندیدی هاوپەیمانی کۆمار، 52.18%ـی دەنگەکانی بەدەستهێناوە و کەمال کڵچدارئۆغڵو، کاندیدی هاوپەیمانی میللـەت 47.82ـی دەنگەکانی بەدەستهێناوە.

بەگوێرەی زانیارییەکانی کۆمیسیۆنی باڵای هەڵبژاردنەکانی تورکیا، لە گەڕی دووەمی هەڵبژاردنی سەرۆکایەتی تورکیا، 54 ملیۆن و 23 هەزار و 601 هاووڵاتی دەنگیان داوە و رێژەی بەشداریکردن 84.15% بووە.

لەبارەی ئەنجامەکانیشەوە، کۆی گشتی دەنگەکانی ئەردۆغان لە گەڕی دووەمی هەڵبژاردن،  27 ملیۆن و 834 هەزار و 589 دەنگ بووە و لە بەرامبەردا، کڵچدارئۆغڵو 25 ملیۆن و 504 هەزار و 724 کەس دەنگی هێناوە. بە فەرمیش کۆمیسیۆنی باڵای هەڵبژاردنەکانی تورکیا، ئەنجامی کۆتایی پەسەندکرد و رەوانەی رۆژنامەی فەرمی دەوڵەتی کردووە بۆ بڵاوکردنەوە و چوونە بواری جێبەجێکردنەوە، کە خۆی لە سوێندنخواردنی سەرۆک کۆمار و راگەیاندنی کابینەی نوێی حکومەتی تورکیا دەبینێتەوە لەلایەن سەرۆک کۆماری هەڵبژێدراوەوە، کەوا بڕیارە رۆژی شەممەی داهاتوو رێورەسمی بۆ رێکبخرێت.

بەگوێرەی دەرئەنجامەکانی کۆمیسیۆن لە گەڕی یەکەمی هەڵبژاردن، رەجەب تەیب ئەردۆغان لە هاوپەیمانی کۆمار، 49.52%ـی دەنگەکانی بەدەستهێناوە و رکابەرە سەرەکییەکەی کەمال کڵچدارئۆغڵو، لە هاوەپەیمانی میللـەت 44.88%ـی دەنگەکانی بەدەستهێنا و سینان ئۆغانیش لە هاوپەیمانی ئاتا، 5.17%ـی دەنگەکانی بەدەستهێنا.

بەپێی رێژەی دەنگەکانی هەڵبژاردنیش لە گەڕی یەکەم کە رێژەی بەشداریکردن گەیشتە 86.98%، رەجەب تەیب ئەردۆ‌غان، 27 ملیۆن و 133 هەزار 837 دەنگی بەدەستهێنا، کەمال کڵچدارئۆغڵوش 24 ملیۆن و 594 هەزار و 932 دەنگی بەدەستهێنا، دەنگەکانی سینان ئۆغانیش بریتی بوو لە دوو ملیۆن 831 هەزار و 208 دەنگ.