ڤیان سه‌بری: قبوڵمان نه‌كرد ده‌ستكاری بڕگه‌ی حه‌وتی مادده‌ی 14 بكرێت

ڤیان سەبری، سەرۆکی فراکسیۆنی پارتی دیموکراتی کوردستان لە پەرلەمانی عێراق
ڤیان سەبری، سەرۆکی فراکسیۆنی پارتی دیموکراتی کوردستان لە پەرلەمانی عێراق

K24 - هەولێر:

سه‌رۆكی فراكسیۆنی پارتی له‌ په‌رله‌مانی عێراق رایده‌گه‌یه‌نێت، پێشتر رێككه‌وتنێك له‌باره‌ی مادده‌ی 14ـی پڕۆژه‌ یاسای بودجه‌ كرابوو، به‌ڵام كه‌ دانیشتنی په‌رله‌مان ده‌ستیپێكرد، ئاراسته‌كان گۆڕان. ده‌شڵێت: " وه‌ك پارتی قبوڵمان نه‌كرد ده‌ستكاری بڕگه‌ی حه‌وتی مادده‌ی 14 بكرێت".

ڤیان سه‌بری سه‌رۆكی فراكسیۆنی پارتی له‌ په‌رله‌مانی عێراق به‌ كوردستان24ـی راگه‌یاند، پێشتر رێككه‌وتن له‌باره‌ی مادده‌ی 14 كرابوو، كه‌ پێكهاتبوو له‌ حه‌وت بڕگه‌، له‌ كۆتایی بڕگه‌كه‌ باس له‌وه‌ ده‌كات كه‌ ئه‌گه‌ر بۆچوونی جیاواز له‌نێوان حكومه‌تی هه‌رێمی كوردستان و حكومه‌تی عێراق دروست بوو، لیژنه‌یه‌كی بۆ پێكبهێندرێت، له‌ماوه‌ی مانگێكدا راپۆرت بۆ سه‌رۆك وه‌زیرانی عێراق به‌رزبكه‌نه‌وه‌، ئه‌و بڕیاری پێویست ده‌ربكات.

سه‌رۆكی فراكسیۆنی پارتی گوتی: "هه‌ندێ فراكسیۆن له‌ناو دانیشتنی په‌رله‌مان ویستیان بڕگه‌ی حه‌وته‌می مادده‌ی 14 به‌ شێوه‌یه‌كی دیكه‌ بێت،‌ ئه‌گه‌ر ناكۆكی له‌ نێوان هه‌رێم و به‌غدا هه‌بێت و دوای 15 رۆژ ده‌توانن شایسته‌ داراییه‌كان و مووچه‌ی هه‌رێمی كوردستان ببڕن، ئێمه‌ وه‌ك پارتی ئه‌مه‌مان قبوڵ نه‌كرد، ئێستا دووباره‌ رێككه‌وتن كراوه‌".

پەرلەمانی عێراق لە پرۆسەی دەنگدان لەسەر پرۆژەیاسای بودجەی گشتی بۆ ساڵەکانی (2023، 2024 و 2025) بەردەوامە و تا ئێستا لە هەردوو دانیشتنی هەردوو رۆژی هەینی و شەممە، 18 ماددەی پەسەندکردووە و دوو ماددەشی لاداوە.

درەنگانی شەوی (8ـی حوزەیرانی 2023) پەرلەمانی عێراق بە ئامادەبوونی 258 پەرلەمانتار لە کۆی 329 پەرلەمانتار دەستی بە دانیشتنی تایبەت بە دەنگدان بە پرۆژەیاسای بودجەی گشتی کرد کە پێشتر دوو خوێندنەوەی بۆ کرابوو،دوای ئەوەی لە رۆژی (13ـی ئادار/مارسی 2023) لەلایەن ئەنجوومەنی وه‌زیرانی عێراقەوە پەسەندکرا و رەوانەی پەرلەمانی عێراقی کرد.