ستیڤ لووتس: یەکێک لەفاکتەرە سەرەکییەکانی هاتنی کۆمپانیا ئەمەریکییەکان بوونی سەقامگیری هەرێمی کوردستانە
K24 – هەولێر:
جێگری سەرۆکی ژووری بازرگانی ئەمەریکا بۆ کاروباری رۆژهەڵاتی ناوەڕاست، هەنگاوەکانی سەرۆکوەزیران، مەسرور بارزانی بۆ ئەنجامدانی گۆڕانکاری بە گرنگ وەسفکرد. جەختیشی، لە بەهێزکردنی پەیوەندییە بازرگانییەکانی نێوان ئەمەریکا و هەرێمی کوردستان کردەوە.
ستیڤ لووتس، جێگری سەرۆکی ژووری بازرگانی ئەمەریکا بۆ کاروباری رۆژهەڵاتی ناوەڕاست، لە میانەی پێشکەشکردنی وتارێک بەبۆنەی کردنەوەی بڕاند و وێبسایتی ئینڤێست کوردستان، رایگەیاند، "ئێمە جەختمان لەسەر کەرتی کشتوکاڵە و یەکێک لەفاکتەرە سەرەکییەکانی هاتنی کۆمپانیا ئەمەریکییەکان بوونی سەقامگیری هەرێمی کوردستانە".
هەروەها راشیگەیاند، خۆشحاڵین کە کۆمەڵێک کۆمپانیای بواری کشتوکاڵی لەگەڵ ئێمە بەشدارن، لە بواری خۆراک و بەرهەمهێنان کشتوکاڵی و کۆگاکردن و دابەشکردنی بۆ چێشتخانەکان، هەروەها تیمەکە 14 کۆمپانیا و 24 بازرگان تێدا بەشدارن.
جێگری سەرۆکی ژووری بازرگانی ئەمەریکا بۆ کاروباری رۆژهەڵاتی ناوەڕاست، جەختیشی، لە بەهێزکردنی پەیوەندییە بازرگانییەکانی نێوان ئەمەریکا و هەرێمی کوردستان کردەوە.
ستیڤ لووتس، گوتیشی: ئەو شاندەی کە لەگەڵ ئێمەیە وەڵامێکە بۆ ئەو خواست و ئەو روئیایەی کە سەرۆکی حکومەتی هەرێمی کوردستان بۆ فرەچەشنکردنی ئابووری هەرێمی کوردستان هەیەتی و ئەتوانم بڵێم هەرێمی کوردستان خاکی دەرفەتەکانە.
جێگری سەرۆکی ژووری بازرگانی ئەمەریکا بۆ کاروباری رۆژهەڵاتی ناوەڕاست، دەشڵێت: "هیوادارم بتوانین پێکەوە پلاتفۆڕمێکی کارکردن دروستبکەین بە تایبەتی لە بڕاندنی ئینڤێست کوردستان، بۆ ئەوەی بە یەکەوە ببینە هاوبەشێکی سەرەکی و هەوڵبدەین وەبەرهینان لە کوردستان بکەین ببینە فاکتەر و هاندەر بۆ هەموو ئەوانەی کە دەیانەوێت لە کوردستان کاربکەن".