دیاری حسێن: دۆخی کوردستان وا دەخوازێت لایەنەکان لەگەڵ یەکدی تەبا بن

K24 – سلێمانی:

بەرپرسانى پارتى دیموکراتى کوردستان و یەکێتى  رایدەگەیەنن،  ئامادەن بۆ چارەسەرى کێشەو گرفتەکانى نێوانیان کۆببنەوە. هاوکات یاریدەدەری بەرپرسی مەکتەبی رێکخستنی پارتی لە سلێمانی دەڵێت: دۆخی کوردستان وا دەخوازێت لایەنەکان لەگەڵ یەکدی تەبا بن.

دیاری حسێن، یاریدەدەری بەرپرسی مەکتەبی رێکخستنی پارتی دیموکراتی کوردستان لە سلێمانی، تایبەت بە کوردستان24، رایگەیاند، پارتی و یەکێتی دەبێت کۆببنەوە چونکە کوردستان وا دەخوازێت کە پێکەوە کاربکەین و پێکەوە هەنگاو بهاوێژین.

لەلایەن خۆیەوە، ستران عەبدوڵڵا، ئەندامی مەکتەبی سیاسی یەکێتی بۆ کوردستان24، گوتی: یەکێتی هیچ کاتێک کۆبوونەوەی رەتنەکردووەتەوە، هەروەها یەکێتی هیچ کاتێک سیاسەتی داخستنی دەرگاکانی رەچاونەکردووە.

16ــی ئایاری 2023، شاندی هەردوولا لە بارەگای مەکتەبی سیاسی یەکێتی لە سلێمانی کۆبوونەوە و لە راگەیەندراوێکی هاوبەشدا رایگەیاند: "هەردوو لا بڕیارماندا وەک  یەک تیم کار بکەین و زنجیرەیەک کۆبوونەوەی دیکەش  ئەنجامبدرێت بۆ فەراهەمکردنی کەش و هەوای لەبار لە رووی یاسایی و سیاسییەوە بۆ ئەنجامدانی هەڵبژاردن و رووبەڕووبونەوەی ئەو تەحەدیاتانەی لە ناوچەکەدا هەن".