ئەندامێكی مەکتەبی هەڵبژاردنی پارتی: بۆ هەڵبژاردنی ئەنجوومەنی پارێزگاکان لە 7 پارێزگا کاندیدمان دەبێت

K24 – بەغدا:

بڕیارە لەرۆژی 18ـی کانوونی یەکەمی ئەمساڵ، هەڵبژاردنی ئەنجوومەنی پارێزگاکانی عێراق بەڕێوەبچێت، کۆمسیۆنی باڵای هەڵبژاردنەکانیش لە 1ـی تەمموزەوە بۆ ماوەی یەک مانگ دەرگای خۆپاڵاوتن بۆ حزب و هاوپەیمانێتییەکان دەکاتەوە، هاوکات ئەندامێكی مەکتەبی هەڵبژاردنی پارتی دەڵێت: بۆ هەڵبژاردنی ئەنجوومەنی پارێزگاکان لە 7 پارێزگا کاندیدمان دەبێت.

کۆمسیۆنی باڵای هەڵبژاردنەکانی عێراق بە درێژایی مانگی تەمووز ناوی پارتە سیاسی و هاوپەیمانێتییە نوێیەکان تۆماردەکەن بۆ هەڵبژاردنی ئەنجوومەنی پارێزگاکانی عێراق، کە بڕیارە لە رۆژی 18ـی کانوونی یەکەمی ئەمساڵ بەڕێوەبچێت، لە رابردوودا 269 پارتی سیاسی لە کۆمیسیۆن تۆمارکرابوون، ئێستاش بە میکانزمی نوێ و پێدانی بڕی 5 ملیۆن دینار حزبەکان ناوی خۆیان نوێدەکەنەوە لە کۆمیسیۆن، هەروەها هەڵبژاردنەکان بە سیستمی سانت لیگۆ بەڕێوەدەچێت و بە تەواوی پشت دەبەستێت بە یاسایی هەمواری سێیەمی هەڵبژاردنەکانی عێراق.

داود سلێمان، بەڕێوەبەری راهێنان لە کۆمیسێۆنی باڵای هەڵبژاردنەکانی عێراق، تایبەت بە کوردستان24ـی راگەیاند، "مەرجەکانی بەشداریکردن لە هەڵبژاردن لە  هەمواری سێیەمی یاسایی هەڵبژاردنەکان ماف بە حزبەکان دەدات کە بەشداری لە هەڵبژاردن بکەن، بەڵام بەو مەرجەی هەر حزبێک چوە ناو هەر هاوپەیمانیەتیەک، نابێت بە تەنیاش بەشداریبکات، بە تایبەت لە ناو هەمان پارێزگا".

زیا مەندەلاوی، ئەندامی مەکتەبی هەڵبژاردنی پارتی دیموکراتی کوردستان رایگەیاند، وەک بڕیارێکی سەرەتایی لە پارێزگاکانی کەرکووک، نەینەوا، سڵاحەدین، دیالە، بەغدا و واست کاندیدیان دەبێت. بە گوتەی خۆشیان، کار لە سەر ئەوە دەکەن کۆتایی فەیلییەکانی بەغدا بەدەستبهێنن.