35 کەس لە کەمپی هۆل دەگەڕێندرێنەوە فەرەنسا
K24 - هەولێر
وەزارەتی دەرەوەی فەرەنسا گەڕاندنەوەی 35 کەسی بە رەگەز فەرەنسی لە کەمپی هۆل راگەیاند.
وەزارەتی دەرەوەی فەرەنسا بڵاویکردەوە، لە چوارەم ئۆپەراسیۆنی هاوشێوەدا توانیویانە 10 ژن و 25 منداڵ-ی چەکدارانی داعش لە کەمپی هۆلی باکووری رۆژهەڵاتی سووریاوە بۆ فەرەنسا بگێڕنەوە.
ئاماژەی بەوەشکردووە، منداڵەکان رادەستی یەکەکانی تایبەت بەچاودێری منداڵان کراون و لەژێر چاودێریدا دەبن، بەڵام ژنەکان رادەستی دەسەڵاتی دادوەری دەکرێن و رێکاری پێویستیان لەگەڵ دەگیرێتەبەر.
کەمپی هۆڵ دەکەوێتە پارێزگای حەسەکەی رۆژئاوای کوردستان، بەگوێرەی ئامارەکان زیاتر لە 50 هەزار ژن و منداڵی چەکدارانی داعشی تێدایە و بەشێکی زۆر لەو ژن و منداڵانەی لەناو کەمپەکەدان خەڵکی وڵاتانی رۆژئاوان.