حەشدی شەعبی لە کەرکووک زەوی هاووڵاتییانی کورد داگیر دەکەن
K24 – کەرکووک
لە كەركووك حەشدی شەعبی دەستیان بەسەر زەوییەکدا گرتووە کە رووبەرەکەی 60 دۆنمە، زەوییەكە لە یەكێك لە گەڕەکە کوردنشینەکانی شارەكەدایە، و دەیانەوێت بارەگایەکی سەربازی تیادا دروست بکەن، ژمارەیەک پەرلەمانتاری عێراق، چوونەتە سەر زەوییەکە و داوای راگرتنی کاری دروستكردنی بارەگاكەیان کردووە، بەڵام ئەو هێزە رێگەیان نەداوە كە ئیشكردن بۆ دروستكردنی بارەگەكە رابگیرێت.
لەماستەر پلانی شارەوانی کەرکووکدا، زەوییەکە خزمەتگوزارییە، و شوێنی دروستکردنی باخچەیەکی گشتییە و دەبێت دروست بکرێت، بەڵام حەشدی شەعبی، بەشێوەی زیادەڕۆ لەو جێگەیەدا، دەیانەوێت دەست بە دروستکردنی بارەگاکەیان بکەن.
بارەگای مەکتەب سیاسی یەکێتی نیشتمانی کوردستان لە کەرکووک چەند سەد مەترێک لەو زەویەوە دوورە و ئەندامێکی سەرکردایەتی یەکێتی دەڵێت: حەشدی شەعبی بەڵێنیان داوە کە کارکردن لەوێ رابگرن.
سیروان کوێخان نەجم، سەرکردایەتی یەکێتی بە کوردستان24ی گوت: "ئەمە جۆرێکە لە تەعریب کردنی ناوچەکە، چونکە هەموو دانیشتووانی ناوچەکە کوردن".
گوتیشی: "فەرماندەی ئۆپەراسیۆنەکانی کەرکووک بەڵێنی داوە واز لە کارکردن بۆ دروستکردنی ئەو بارەگایە دەهێنرێت، ئەگەر ئەوە نەکرێت شێوازی تر دەگرینەبەر".
لەدوای 16ی ئۆکتوبەری 2017، حەشدی شەعبی لە شاری کەرکووکدا بووەتە هێزێکی باڵا دەست، پێشووتر لە گەڕەک و ناوچە عەرەبیەکاندا دەستیان بەسەر زۆر زەویدا گرتووە، بەڵام كاردانەوەكان بەرانبەر ئەم هەوڵەیان جیاوازدەبێت، کە دەستیان بۆ زەوی و شوێنی خزمەتگوزاری گەڕەک و ناوچە کوردنشینەکان بردووە.