نرخی سووتەمەنی لە تورکیا جارێکی دیکە بەرزبووەوە
K24 - هەولێر
نرخی سووتەمەنییەکان لە تورکیا دووبارە بەرزبووەوە و نرخی یەک لیتر بەنزین گەیشتە یەک دۆلار و 50 سەنت.
بە واژووی رەجەب تەیب ئەردۆغان، سەرۆک کۆماری تورکیا، بڕیارنامەی نوێ لەبارەی رێکخستنەوەی نرخی سووتەمەنییەکان لە رۆژنامەی فەرمی بڵاوکرایەوە و بەوشێوەیەش نرخی یەک لیتر بەنزین لە 28 لیرەوە بوو بە 34 لیرە کە دەکاتە دۆلارێک و 50 سەنت و نرخی یەک لیتر گازیش گەیشتە 32 لیرە.
ئەو بڕیارە لەلایەن ئۆپۆزیسیۆنی تورکیا کاردانەوەی لێکەوتەوە و ئەحمەد داودئۆغڵو، سەرۆکی پارتی ئایندەی تورکیا لە هەژماری فەرمی خۆی لە تویتەر رایگەیاند، "بەرزکردنەوەی نرخی سووتەمەنییەکان لە کات و ساتی ئێستا مایەی قبوڵکردن نییە".
بەرزکردنەوەی نرخی سووتەمەنییەکان لە تورکیا دوای ئەوە دێت، هەفتەی رابردوو کەمترین مووچەی فەرمانبەران بۆ 22 هەزار لیرە بەرزکرابوویەوە.