كاردینال لویس ساكۆ بۆ نێچیرڤان بارزانی: هه‌رێمى كوردستان سه‌رزه‌مينى پێكهوهژيان و يه‌كترقبووڵكردنه
K24 - هەولێر
سەرۆكی كەنیسەی كلدان لە عێراق و جیهان رایدەگەیەنێت، هەرێمی كوردستان سه‌رزه‌مينى پێكهوهژيان و يه‌كترقبووڵكردنه و شانازى پێوه ده‌كه‌ن. نێچیرڤان بارزانیش ئاماژە بەوە دەدات، "گرنگه عێراق به هه‌رێمى كوردستانه‌وه به خێمه‌يه‌ك بۆ كۆكردنه‌وه‌ى هه‌موو پێكهاته ئايينى و نه‌ته‌وه‌ييه‌كان بمێنێته‌وه".
ئه‌مڕۆ سێشه‌ممه 25ـی تەممووزی 2023، نێچيرڤان بارزانى، سه‌رۆكى هه‌رێمى كوردستان پێشوازى له كاردینال لویس ساكۆ، پاتریارك و سەرۆكی كەنیسەی كلدان لە عێراق و جیهان و شاندێكی یاوەری كرد.
بە گوێرەی راگەیەندراوێکی سەرۆکایەتی هەرێمی کوردستان، له بەشێکی کۆبوونەوەکەدا هەردوولا تاوتوێی كشاندنه‌وه‌ى فه‌رمانى سه‌رۆكايه‌تيى كۆمارى عێراقى تايبه‌ت به كه‌نيسه‌ى كلدانىیان کردووە و، نێچيرڤان بارزانى دووپاتیكردووەتەوە، "گرنگه عێراق به هه‌رێمى كوردستانه‌وه به خێمه‌يه‌ك بۆ كۆكردنه‌وه‌ى هه‌موو پێكهاته ئايينى و نه‌ته‌وه‌ييه‌كان بمێنێته‌وه" و هيواشی خواستووە، لەتیف رەشید، سەرۆککۆماری عێراقى "به زووترين كات ئه‌و كێشه‌يه چاره‌سه‌ر بكات".
لە بەشێکی دیکەی راگەیەندراوەکەدا هاتووە: "سه‌رۆكى هه‌رێمى كوردستان جه‌ختى له‌وه كرده‌وه، پێكهوهژيان و يه‌كترقبووڵكردن، بڕوا و پره‌نسيپه و جوانيى عێراق له‌وه‌دايه نيشتمانى هه‌موو پێكهاته‌كان بێت و تيايدا مافى هه‌مووان پارێزراو بێت."
بە گوێرەی راگەیەندراوەکە، كاردينال ساكۆ سوپاس و پێزانينى بۆ پشتيوانيى نێچيرڤان بارزانى دەربڕیوە و دووپاتىكردووەتەوە، "هه‌رێمى كوردستان سه‌رزه‌مينى پێكهوهژيان و يه‌كترقبووڵكردنه و شانازى پێوه ده‌كه‌ن" و ئاماژەشی بەوە داوە، کێشەکەی لەگەڵ فەرمانێکی سەرۆککۆماری عێراق، "هه‌رگيز ڕێگه له كار و ئه‌ركه‌كانى ناگرێت و به‌رده‌وام ده‌بێت له پارێزگاريكردن له عێراق و پێكهوهژيان".
دۆخى ده‌شتى نه‌ينه‌وا و چه‌ند پرسێكى ديكه‌ى په‌يوه‌ست به دۆخى كه‌نيسه و مه‌سيحييه‌كان به‌گشتى، لايه‌نێكى ديكه‌ى ديداره‌كه بوو كه پشتیوان سادق، وه‌زيرى ئه‌وقاف و كاروبارى ئايينیی حكومه‌تى هه‌رێمى كوردستان ئاماده‌ى بوو.