کۆمیسیۆنی باڵای هەڵبژاردنەکان پرۆسەی نوێکردنەوەی تۆماری دەنگدەرانی درێژکردەوە

K24 – هەولێر:

کۆمیسیۆنی باڵای سەربەخۆی هەڵبژاردنەکانی عێراق رایگەیاند، پرۆسەی نوێکردنەوەی تۆماری دەنگدەران تاوەکو رۆژی شەممەی داهاتوو بۆ هەموو عێراق و لە هەرێمی کوردستان تا رۆژی یەکشەممەی داهاتوو درێژکراوتەوە.

رۆژی یەکشەممە (6ـی ئابی 2023)، کۆمیسیۆنی باڵای هەڵبژاردنەکانی عێراق بڵاویکردەوە، نوێکردنەوەی تۆماری دەنگدەران تا کۆتایی دەوامی رۆژی (12ـی ئابی 2023) درێژکرایەوە لە هەموو پارێزگاکانی عێراق.

هاوکات ئەحمەد مازن، بەڕێوەبەری راگەیاندنی لقی هەولێری کۆمیسیۆنی باڵای هەڵبژاردنەکانی عێراق بە کوردستان24ـی راگەیاند، پرۆسەی نوێکردنەوەی تۆماری دەنگدەران لە هەرێمی کوردستان تا کۆتایی دەوامی رۆژی (13ـی ئابی 2023) بەردەوام دەبێت.

کۆمیسیۆن جەختی لەسەر ئەوەکردووەتەوە، هەرکەسێک دەیەوێت زانیارییەکانی نوێبکاتەوە و شوێنی دەنگدانی بگوازێتەوە یاخود بایۆمەتری تۆماربکات، تاوەکو رۆژی شەممەی داهاتوو دەتوانێت سەردانی بنکەکانی دەنگدان بکات بە پێچەوانەوە پرۆسەکە کۆتایی دێت.

ئەمەش لە کاتێکدایە، رۆژی شەممە (8ـی تەمموزی 2023)، نووسینگەی کۆمیسیۆنی باڵای سەربەخۆی هەڵبژاردنەکانی عێراق لە ھەولێر، لە راگەیەندراوێکدا داوای لە دەنگدەرانی شاری هەولێر کرد، سەردانی بنکەکانی تۆمارکردنی دەنگدان بکەن بۆ مەبەستی نوێکردنەوەی داتای بایۆمەترییان، لە رۆژی یەکشەممە (9ـی تەمموزی 2023) تاکو رۆژی دووشەممەی مانگی ئاب (7ـی ئابی 2023).

ئەم رێکارانەی کۆمیسیۆنی باڵای سەربەخۆی هەڵبژاردنەکانی عێراق لە چوارچێوەی ئامادەکارییەکانە بۆ سەرپەرشتیکردنی هەردوو هەڵبژاردنی ئەنجوومەنی پارێزگاکانی عێراق کە لە (18ـی کانوونی یەکەمی 2023) و هەڵبژاردنی پەرلەمانی کوردستان لە (25ـی شوباتی 2024) بەڕێوەدەچن.

هەروەها، کۆمیسیۆنی باڵای سەربەخۆی هەڵبژاردنەکانی عێراق ئەو وادەیەی کە بۆ تۆمارکردنی لیست و هاوپەیمانیەتییەکان بۆ هەڵبژاردنی ئەنجوومەنی پارێزگاکانی عێراق دیاریکردبوو، بڕیار بوو ئەمڕۆ کۆتایی بێت، بۆ سبەی دووشەممە درێژکرایەوە و بەپێی ئامارەکانی کۆمیسیۆنیش تا ئێستا نزیکەی 3030 حزب و 37 هاوپەیمانیەتی خۆیان تۆمارکردووە.

0