ئیتاڵیا: دەریای ناوەڕاست بووه‌ته مەترسیدارترین رێگەی پەڕینەوەی کۆچبەران لە جیهاندا
K24 - هه‌ولێر:
لێشاوی کۆچی نایاسایی لە رێگەی دەریای ناوەڕاستەوە بۆ ئەوروپا بەردەوامە و تا دێت ژمارەی قوربانیان زیاتر ده‌بن، زۆربەی ئەو کۆچبەرانەی لە ئەفریقا روو لە ئەوروپا دەکەن، لە تونسەوە بەڕێدەکەون، چونکە کەمتر لە 150 کیلۆمەتر لە دوورگەیەکی ئیتاڵیاوە دوورە.
ئیتاڵیاش ئاشکرای دەکات، ئەمساڵ زیاتر لە 94 هەزار کۆچبەری نایاسایی گەیشتوونەتە ئەو وڵاتە، هەروەها ئەمساڵ 126 کۆچبەر کە لە مەغریبەوە هەوڵیانداوە بگەنە دوورگەکانی ئیسپانیا، گیانیان لە دەستداوە و بێسەرووشوێن بوونە.
لێشاوی کۆچبەرە نایاساییەکان و بەکارهێنانی رێگای ده‌ریای ناوه‌ڕاست بۆ گەیشتن بە ئەوروپا و بە تایبەت بۆ ئیتاڵیا زیاتر بووە، ئەمەش وایکردووە ژمارەی قوربانیانیش بەهۆی تێکشکانی بەلەمەکانەوە زیاتر ببێت.
ئیتاڵیا یەکێکە لەو وڵاتانەی زۆرترین کۆچبەر لە ئەفریقا و بە تایبەت لە تونسەوە روویلێدەکەن، چونکە تونس تەنیا 145 کیلۆمەتر لە دوورگەی لامپیدوسای ئیتاڵیا دوورە.
لە نوێترین رووداوی نوقمبوونی بەلەمی کۆچبەران لە دەریای ناوەڕاست، 41 کۆچبەر گیانیان لە دەستداوە، چوار کۆچبەریش رزگارکراون و خەڵکی وڵاتە ئەفریقییەکانن و زۆربەی کۆچبەرەکان لە تونسەوە بەڕێدەکەون، لە حەوتی ئەم مانگە، چەند بەلەمێکی دیکەی کۆچبەران لە کەناوارەکانی تونس و بیابانی رۆژئاوا تێکشکان و بوونە هۆی گیان لەدەستدانی 16 کۆچبەر و بێسەرووشوێن بوونی 44 کۆچبەر، هەروەها لە شەشی ئەم مانگەش بەلایەنی کەمەوە 30 کۆچبەر لە کەناراوەکانی دوورگەی لامپیدوسا بێسەرووشوێن بوونە.
وەزارەتی ناوخۆی تونس ئاشکرای دەکات، لە سەرەتای ئەمساڵ تا 20ـی تەمموز، 901 تەرمی کۆچبەر دۆزراوەنەتەوە، 34 هەزار و 290 کۆچبەریش رێگریان لێکراوە و رزگارکراون، هەروەها مەغریب 150 کیلۆمەتر لە دوورگەکانی کەناری ئیسپانیاوە دوورە، بەم دواییانە مەغریب رێگری لە 56 کۆچبەری نایاسایی کرد بگەنە دوورگەکانی کەناری ئیسپانیا.
رێکخراوی کۆچی نێودەوڵەتی ئاشکرای دەکات، لە نیوەی یەکەمی 2023، 126 کۆچبەر لە هەوڵدان بە گەیشتن بە دوورگەکانی کەناری گیانیان لە دەستداوە و بێسەرووشوێن بوونە.
هەروەها وەزارەتی ناوخۆی ئیتاڵیا رایگەیاند، ئەمساڵ 94 هەزار کۆچبەر گەیشتوونەتە ئیتاڵیا، لە 2014ـەوە تا ئێستا زیاتر لە 20 هەزار کۆچبەر کە هەوڵیانداوە لە ئەفریقاوە بۆ ئەوروپا بپەڕنەوە گیانیان لە دەستداوە، لەو ژمارەیەش تەنیا ئەمساڵ هەزار و 800 کۆچبەر گیانیان لە دەستداوە، ئەمەش وایکردووە دەریای ناوەڕاست ببێتە مەترسیدارترین رێگەی پەڕینەوەی کۆچبەران لە جیهاندا.
قه‌یرانی کۆچبەران لە دەریای ناوەڕاست:
دووری تونس و ئیتاڵیا
145 کیلۆمەتر
نۆی ئاب
41 کۆچبەر گیانیان لە دەستداوە
حەوتی ئاب
گیان لە دەستدانی 16 کۆچبەر
44 کۆچبەر بێسەروشوێنبوون
شەشی ئاب
30 کۆچبەر بێسەرووشوێنبوون
تونس
یەکی کانوونی دووەم-20ـی تەممووز
تەرمی 901 کۆچبەر
34,290 کۆچبەر رزگارکراون
مەغریب
دووری مەغریب و دوورگەکانی کەناری
150 کیلۆمەتر
رێگریکردن لە 56 کۆچبەر
هەوڵی کۆچبەران بۆ گەیشتن بە ئیسپانیا
شەش مانگی یەکەمی 2023
گیانلەدەستدان و بێسەروشوێنبوون
126 کۆچبەر
ژمارەی گەیشتنی کۆچبەران بە ئیتاڵیا
94,000
2014-2023
گیانلەدەستدانی 20,000 کۆچبەر
2023
1,800