تیپێکی هونەری لە رۆمانیاوە کولتووری رەسەنی پێکهاتەکانی کەرکووک بە جیهان دەناسێنێت
K24 - هەولێر
تیپی هونەری میللی کەرکووک، لە ڕێگەی دامەزراوەی ڕایەڵ بۆ ئاڵوگۆڕی کولتووری و گەشەپێدانی مرۆیی، لەسەر ئاستی عێراق بەشداری فیستیڤالی نێودەوڵەتی ڕۆمانیا دەکات.
تیپەکە گوزارشت لە هەر چوار نەتەوەی عێراق دەکات، کە کورد، عەرەب، تورکمان، سریانی لەخۆوە گرتووە و بۆ ئەم فێستیڤاڵە بە سێ تابلۆ بەشدارە، کە بریتین لە تابلۆی برایەتی، گەرمیان، شوان.
هەڵۆ جەباری، سەرپەرشتیاری تیپەکە بە کوردستان24ـی راگەیاند: "تیپەکەمان بەشدار دەبێت لە سێ فیستیڤاڵی جیاوازدا و چالاکییەکانیشمان لە وڵاتی رۆمانیا 14 رۆژ بەردەوام دەبن و لە سێ شاری جیای رۆمانیا دەست دەکەین بە نمایشەکانی شاری فاسلوێ و برێلا و کارش".
گوتیشی: "ئەم تیپە جوانە لە ڕێگەی جل و بەرگ و نمایشی تابلۆی هەڵپەڕکێیەوە گوزارشت لە ئاشتی و پێکەوە ژیانی پێکهاتەکانی کەرکوک دەکەن، لە سەرجەم خولەکانی فێستیڤاڵی نێودەوڵەتی شانۆی شەقام لە کەرکووک رۆڵی بەرچاویان هەبووە، لە ئێستاشدا لە فێستیڤاڵی نێودەوڵەتی کولتور و فۆلکلۆری میللی لە وڵاتی ڕۆمانیا سەرەنجی هەمووانیان بۆ لای خۆیان ڕاکێشاوە، ئەگەرچی بەهۆی ئاڵای کوردستانەوە رێگری زۆرمان لێکرا، بەڵام ئێمە هەر سووربووین لەسەر گەشانەوەی ئاڵای کوردستان لە چوارچێوەی فیستیڤاڵەکەدا و توانیمان لە یەکەم چالاکیی دا بە ئاڵا و پۆشاکی کوردییەوە کولتوری خۆمان بە وڵاتانی بەشداربوو بناسێنین و تا 16ـی ئابیش چالاکییەکانمان لەم وڵاتە بەردەوامی دەبێت".
جێگەی باسە، تیپی هونەری میللی کەرکووک، لە ساڵی 2008 لەلایەن وەزارەتی رۆشنبیری و لاوانی حکومەتی هەرێمی کوردستان دامەزراوە و لە 20 ئەندامی کچ و کوڕ پێکهاتووە و تا ئێستاش بەشداری چەندین فیستیڤاڵی نێودەوڵەتی و ناوخۆییان کردووە و ئامانجیش لە دامەزراندنی تیپەکە پێشکەشکردنی تابلۆی پێکەوە ژیان و کۆکردنەوەی نەتەوەکانە لە چوارچێوەی هەرێمی کوردستان و عێراق بە گشتی.