به‌ وێنه‌: هێرشی سه‌ر كڵێساكه‌ی فه‌ڕه‌نسا

K24 - هه‌ولێر:

پۆلیسی فه‌ڕه‌نسی ئه‌و دوو ڕفێنه‌ره‌ی كوشت كه‌ هێرشیان كرده‌ سه‌ر كڵێسایه‌كی شاری "سانت ئیتیان" له‌ باكوری فه‌ڕه‌نسا و " قه‌شه‌ی كڵێساكه‌یان سه‌ربڕی و چه‌ند كه‌سێكیان بریندار كرد.

پۆلیس ڕایگه‌یاند دۆخه‌كه‌ كۆنترۆڵكراوه‌ و هه‌ردوو هێرشكه‌ره‌كه‌ كوژراون.

پۆلیسی فه‌ڕه‌نسا ڕایگه‌یاندووه‌" هێرشكه‌ره‌كان چه‌قۆیانپێبووه‌ و "6" كه‌سیان له‌ناو كڵێسای "سانت ئیتیان" له‌ باكوری فه‌ڕه‌نسادا وه‌ك بارمته‌ ده‌ستبه‌سه‌ر كرد بوو، كه‌ دووان له‌و كه‌سانه‌ ڕاهیبه‌ بوون، به‌پێی زانیارییه‌ سه‌ره‌تاییه‌كان له‌كاتی چوونه‌ ژووره‌وه‌ی پۆلیس بۆ كڵێساكه‌ و كۆنترۆڵكردنی بارودۆخه‌كه‌ یه‌كێك له‌ بارمته‌كان له‌لایه‌ن ڕفێنه‌ره‌كانه‌وه‌ كوژراوه‌.

 سه‌رچاوه‌ هه‌واڵییه‌كانی فه‌ڕه‌نسا  ئاماژه‌یان به‌وه‌كردووه‌ كه‌  پۆلیس چوونه‌ته‌ ناو كڵێساكه‌وه‌ و  بارمته‌كانیان ئازاد كردووه‌ و دوو ڕفێنه‌ره‌كه‌یان ده‌ستگیر كردووه‌، به‌ڵام چه‌ند سه‌رچاوه‌یه‌كی دیكه‌ ئاماژه‌ به‌ كوژرانی هه‌ر دوو ڕفێنه‌ره‌كه‌ ده‌كه‌ن.

ڕۆژنامه‌ی لۆفیگارۆی فه‌ڕه‌نسی ڕایگه‌یاندووه‌ كه‌ ڕفێنه‌ره‌كان "قه‌شه" ی كڵێساكه‌یان سه‌ربڕیووه‌ و ژماره‌یه‌كی دیكه‌شیان بریندار كردووه‌.به‌پێی دواین زانیاری كۆشكی ئه‌لیزێ ڕایگه‌یاندووه‌ كه‌ " فرانسوا ئۆلاند سه‌رۆكی فه‌ڕه‌نسا" ده‌چێته‌ باكوری وڵات و سه‌ردانی شوێنی ڕووداوه‌كه‌ ده‌كات.