مەسرور بارزانی: لەگەڵ سوودانی گەیشتووینەتە رێککەوتنێکی گونجاو بۆ دابینکردنی مووچەی هاووڵاتییان
K24 - هەولێر
سەرۆکوەزیرانی هەرێمی کوردستان رایدەگەیەنێت، لەگەڵ سەرۆکوەزیرانی عێراق گەیشتوونەتە رێککەوتنێکی گونجاو، بۆ دابینکردنی مووچەی هاووڵاتیان. سوپاسی "پشوودرێژیی هاونیشتمانیانی خۆڕاگر"ـیش دەکات کە متمانەیان بە "حکومەتەکەی خۆیان لە دەست نەدا".
ئەمڕۆ یەکشەممە، 17ـی ئەیلوولی 2023، مەسرور بارزانی، سەرۆکی حکومەتی هەرێمی کوردستان راگەیەندراوێکی لەبارەی مووچەی فەرمانبەر و مووچەخۆرانی هەرێمی کوردستان بڵاوکردەوە، لە بەشێکیدا هاتووە: "بە پشتبەستن بەخوای گەورە و ئیرادەی بەهێزی گەلەکەمان، توانیمان بەرگری لە مافی خەلکی کوردستان بکەین و لەگەڵ سەرۆک وەزیرانی فیدراڵ بەڕێز محەمەد شیاع سوودانی بگەینە ڕێککەوتنێکی گونجاو، بۆ دابینکردن مووچەی هاووڵاتیان."
سەرۆکوەزیرانی هەرێمی کوردستان سوپاسی "پشوودرێژیی هاونیشتمانیانی خۆڕاگر" دەکات کە متمانەیان بە "حکومەتەکەی خۆیان لە دەست نەدا". مەسرور بارزانی جەخت لەوە دەکاتەوە، "بە پشتیوانی خوای گەورە بەردەوام دەبین لە خزمەتکردنی هاووڵاتیانی خوشەویست و ڕێگە بە هەوڵە نەزۆکەکان نادەین سەقامگیریی هەرێمی کوردستان تێک بدەن."
دەقی راگەیەندراوەکەی سەرۆکوەزیران مەسرور بارزانی:
بە پشتبەستن بەخوای گەورە و ئیرادەی بەهێزی گەلەکەمان، توانیمان بەرگری لە مافی خەلکی کوردستان بکەین و لەگەڵ سەرۆک وەزیرانی فیدراڵ بەڕێز محەمەد شیاع سوودانی بگەینە ڕێککەوتنێکی گونجاو ، بۆ دابینکردن مووچەی هاووڵاتیان.
سوپاس بۆ پشوودرێژیی هاونیشتمانیانی خۆڕاگر کە متمانەیان بە حکومەتەکەی خۆیان لە دەست نەدا. سوپاس بۆ جەنابی سەرۆک بارزانی کە پاڵپشت و ڕێنیشاندەرمان بوو لە زاڵبون بە سەر کۆسپەکاندا. سوپاس بۆ پالپشتی و ڕۆڵی بەڕێز سەرۆکی هەرێمی کوردستان لە پشتیوانیکردن و سەرخستنی پرۆسەی دانوستان لە گەل حکومەتی فیدرال.
سوپاس بۆ لایەنە سیاسیەکانی عێراقی فیدرال کە پشتیوانمان بوون. سوپاس بۆ لایەنە سیاسیەکانی کوردستان و فراکسیۆنە کوردستیانەکان لە پەرلەمانی عێراقی فیدرال کە پاڵپشت و هاودەنگ بوون لە دەستەبەرکردنی مافی مووچەخۆرانی هەرێمی کوردستان. سوپاس بۆ شاندی حکومەتی هەرێمی کوردستان کە بە بێ ماندووبوون و بە هەستێکی پڕ لە بەرپرسیاریەتی توانییان لەم ئەرکە قورسەدا سەرکەون.
بە پشتیوانی خوای گەورە بەردەوام دەبین لە خزمەتکردنی هاووڵاتیانی خوشەویست و ڕێگە بە هەوڵە نەزۆکەکان نادەین سەقامگیریی هەرێمی کوردستان تێک بدەن.
I am pleased to announce that our efforts to defend the rights of the people of the Kurdistan Region and our agreement with Prime Minister @mohamedshia have been successful.
— Masrour Barzani (@masrourbarzani) September 17, 2023
This has been made possible through the resilience of the Kurdistani people.https://t.co/wxmz5hovEw