حکومەتی هەرێمی کوردستان پاڵپشتی دارایی خاوەن پڕۆژەکان دەکات

K24 – هەولێر:

حکومەتی هەرێمی کوردستان پڕۆژەیەکی راگەیاند بەناوی "گەشانەوە"، کە تاوەکو 150 ملیۆن دیناری عێراقی قەرز بۆ بزنسی بچووک و مامناوەندی دامەزراو دابین دەکات، بەرگدوورێکی سوودمەندبوو لە پڕۆژەکە دەڵێت، "لە رێگەی ئەو پڕۆژەیەی حکومەتەوە بوومە خاوەن کاری خۆم، هەروەها توانیومە لەو رێگەیەوە هەلی کار بۆ چەندین کەسی دیکە بڕەخسێنم".

سامان زراری، بەرگدوور، تایبەت بە کوردستان24ـی رایگەیاند، لەلای کەسێک کارم دەکرد و شاگرد بووم، بەڵام کاتێک حکومەتی هەرێمی کوردستان پڕۆژەی قەرزی بچووکی راگەیاند، ئەو قەرزەم وەرگرت و سوودم لێ بینی.

هاوکات ئاماژەی بەوەدا، "لە ئێستادا خاوەن کاری خۆمم و توانیومە هەلی کار بۆ چەندین کەسی دیکە بڕەخسێنم لە دوکانەکەم".

قەرزی بچووک و مامناوەند یەکێکە لەو قەرزانەی حکومەتی هەرێمی کوردستان بۆ هاووڵاتیانی دابین دەکات، بە جۆرێک هەموو کارسازێک تێیدا سوودمەند دەبێت و رێژەی قەرزەکەش لە 15 ملیۆن دەست پێدەکات تا دەگاتە 150 ملیۆن دینار.

لەلایەن خۆیەوە، نەبەز نەوزاد،  شارەزای ئابووری، بە کوردستان24ـی گوت: قەرزی بچووک و مامناوەندەکان بە رەوڕەوەی پێشکەوتنی ئابووری هەر وڵاتێک دادەنرێت، لە جیهاندا %90ـی دەرفەتی کار لە قەرزی بچووک و مامناوەدەکانە، هەروەها لە رووی ئابوورییەوە ئەم پڕۆژەیە زۆر گرنگە بۆ گەنجان.

قەرزی بچووک و مامناوەند هەزاران هاووڵاتی وەریگرتووە و  لێی سوودمەند بوونە، هەندێک جاریش حکومەت بۆ کار ئاسانی هاووڵاتییەکە داشکانی %15ـی  بۆ کردووە لە دانەوەی قەرزەکەدا.

یەکێک لە تایبەتمەندییەکانی قەرزی بچووک و مامناوەند ئەوەیە بێکاری لە وڵات ناهێڵیت و ئاستی هەژاری زۆر دادەبەزێنێت،  ئەم قەرزەی کە هاووڵاتییانیش وەریدەگرن لە حکومەت نە سوودی بانکی دەچێتە سەر و نە دەبێتە بارگرانی بەسەریانەوە، چونکە مەودای وەرگرتنەوەی قەرزەکە درێژخایەنە.