مەسرور بارزانی پیرۆزبایی لە سەرۆک و سەرکردایەتی یەکێتی دەکات
K24 – هەولێر
مەسرور بارزانی، سەرۆکی حکومەتی هەرێمی کوردستان، بەبۆنەی کۆتاییهاتنی کۆنگرەی پێنجەمی یەکێتی نیشتمانی کوردستان، پیرۆزبایی لە سەرۆک و سەرکردایەتی ئەو حزبە دەکات.
لە بەشێکی پەیامەکەی سەرۆکوەزیرانی هەرێمی کوردستان، کە ئەمڕۆ سێشەممە، 3ـی ئۆکتۆبەری 2023، بڵاوکراوەتەوە، هاتووە: "بە بۆنەی سەرکەوتنی کۆنگرە و دەستنیشانکردنی سەرکردایەتی نوێی یەکێتی، پیرۆزبایی لە ئێوە و هەموو ئەندام و لایەنگرانی حیزبە تێکۆشەرەکەتان دەکەم".
مەسرور بارزانی بە بەپرسانی یەكێتی دەڵێت، "هیوادارم قۆناغێکی نوێ لە خزمەتی گەل و نیشتمان دەستپێبکەن و هەنگاوەکانتان بۆ یەکڕیزی و تەبایی و پەرەپێدان بە دەستکەوتەکان و پاراستنی نیشتمان و بەرژەوەندییە باڵاکانی خاک و خەڵکی کوردستان چڕتر بکەن".
دەقی پەیامی سەرۆکی حکومەتی هەرێمی کوردستان:
بەڕێزان سەرۆک و سەرکردایەتی یەکێتیی نیشتمانیی کوردستان:
بە بۆنەی سەرکەوتنی کۆنگرە و دەستنیشانکردنی سەرکردایەتی نوێی یەکێتی، پیرۆزبایی لە ئێوە و هەموو ئەندام و لایەنگرانی حیزبە تێکۆشەرەکەتان دەکەم.
هیوادارم قۆناغێکی نوێ لە خزمەتی گەل و نیشتمان دەست پێ بکەن و هەنگاوەکانتان بۆ یەکڕیزی و تەبایی و پەرەپێدان بە دەستکەوتەکان و پاراستنی نیشتمان و بەرژەوەندییە باڵاکانی خاک و خەڵکی کوردستان چڕتر بکەن و هەروەها هەماهەنگی و پشتیوانیتان بو جێبەجێکردنی پلان و بەرنامەکانی حکومەت زیاتر بکەن.
مەسرور بارزانی
سەرۆکی حکومەتی هەرێمی کوردستان
2023/10/3