بە ڤیدیۆ؛ هونەرمەندێک لە سنە لە رۆژی مارەبڕینەکەیدا گۆرانییەکی نیشتمانی دەچڕێت
K24 - هەولێر:
لە سنەی رۆژهەڵاتی کوردستان، زاوایەک کە خاوەن پێداویستی تایبەتە و لەهەمانکاتیشدا هونەرمەندە، لە رۆژی دەستپێکی ژیانی هاوسەرییدا گۆرانیی 'وەتەن' دەچڕێت.
یادگار سنەیی، هونەرمەندێکی خاوەن پێداویستی تایبەتە و لە رۆژی مارەبڕینەکەیەدا گۆرانیی 'وەتەن' دەڵێت، کە هۆنراوەکەی لە نووسینی هەردوو شاعیرانی کورد قانع و هێمن موکریانییە.
گۆرانی وەتەن بۆ یەکەمجار لەلایەن هونەرمەندان، یوسف ئاغا و سمایل ئاغای چەوگالی کە هەردوو خەڵکی شاری بۆکانی رۆژهەڵاتی کوردستانن، کراوە بە گۆرانی و دواتر بە دەنگی هونەرمەند حەسەن دەرزی بڵاوبووتەوە و خەڵکێکی زیاتر ئاشنای گۆرانیەکە بوون.
ئەو هونەرمەندە ڤیدیۆی گۆرانیوتنەکەی لە هەژماری تایبەتی خۆی لە ئینستاگرام بڵاوکردووتەوە و نووسیویەتی: هیوای بەختەوری و خۆشبەختی بۆ هەمووتان دەخوازین.
هونەرمەندێکی کورد لە رۆژهەڵاتی کوردستان لە رۆژی مارەبڕین و دەستپێكی ژیانی هاوسەرگیرییەكەی گۆرانیی "وەتەن" دەچڕێت pic.twitter.com/MN7qQPl5IX
— Kurdistan24 (@kurdistan24tv) October 3, 2023
بەشێك لە هۆنراوەی وەتەن:
زەوی ئێستاش لە ڕووت هەڵدێ بدەی سووڕ
نەڕووخای ئاسمانی پیری پشت کووڕ
کە سۆمایی لە چاو باوکان بڕاوە
بەرۆکی پیرە دایکان دادڕاوە
وەتەن قەوم و کەس و کار
وەتەن هۆی ژین و ژیوار
وەتەن ئامێز و دڵدار
وەتەن بۆت دەمرم ئەمجار
بە ناحەق خوێنی تێکۆشەر دەڕێژن
شەهیدی بێ سەر و بێ شوێن دەنێژن
کە کوندی شووم لە گوندی کورد دەخوێنێ
کە گەنجی کورد دەگەوزێنێ لە خوێنێ
وەتەن گیان و دڵی دایە
وەتەن دەینی لە ملمایە
سەری بێ نرخ و بێ مایە
لە پێناوی وەتەندایە