باڵیۆزی ئیتاڵیا لە عێراق : لە عێراق 24 ئەرکی شوێنەوارناسیمان هەیە کە 11ـیان لە هەرێمی کوردستانە
K24 – هەولێر:
باڵیۆزی ئیتاڵیا لە عێراق به كوردستان24ـی راگه‌یاند، پشتیوانی لە رێککەوتنی نێوان هەولێر و بەغدا دەکەین و هه‌روه‌ها گوتیشی: "لە عێراق 24 ئەرکی شوێنەوارناسیمان هەیە، کە 11ـیان لە هەرێمی کوردستانە".
ماوریتزیۆ گرێگانتی باڵیۆزی ئیتاڵیا لە عێراق، تایبه‌ت به كوردستان24ـی راگه‌یاند، پشتیوانی لە رێککەوتنی نێوان هەولێر و بەغدا دەکەین، بڕوام وایە ئەمە چەقی پەیوەندی هەولێر و بەغدایە، لە دەرئەنجامەکەی خۆشحاڵبووین و بڕوامان وایە ئەمە هەنگاوی سەرەتایه بۆ دۆزینەوەی چارەسەرێکی هەمیشەیی، تا خەڵک سوودی لێوەرگرن.
ئاماژه‌ی به‌وه‌شكرد، بۆ جێبەجێکردنی رێککەوتننامه‌ی شه‌نگال، ویستێکی بەهێز لە حکومەتی هەرێمی کوردستان و حکومەتی فیدڕاڵی هەیە، ئەمە بەشێوەیەکی گشتی بۆ خەڵکی عێراق و هەروەها بۆ ئەو خەڵکەش کە لە شنگال دەژین یان پێشتر لە شنگال دەژیان، زۆر گرنگە.
هه‌روه‌ها ماوریتزیۆ گرێگانتی گوتی: "ئیتاڵیا و کۆمەڵگەی نێودەوڵەتی بە تەواوی پاڵپشتی لە رێککەوتننامه‌ی شنگال دەکه‌ن".
له‌باره‌ی پەیوەندییەکانی ئیتاڵیا و حکومەتی هەرێمی کوردستان، باڵیۆزی ئیتاڵیا لە عێراق رایگه‌یاند، "په‌یوه‌ندییه‌كان زۆر باشن، چەندین ساڵە لە چەندین بواره‌كانی وەک ئابووری، بەرەوپێشچوون، کولتووری و بەرگری بەیەکەوە کارکردنێکی بەهێزمان هەیە، بۆ نموونە مەشق بە پێشمەرگە و هێزە ئەمنییەکانی عێراق دەکەین، گەوهەری پەیوەندییەکانمان لە بواری کولتوور و شوێنەوارناسییە، لە عێراق 24 ئەرکی شوێنەوارناسیمان هەیە کە 11ـیان لە هەرێمی کوردستانە".
په‌یوه‌ندییه‌كانی هه‌رێمی كوردستان و ئیتاڵیا له بواره‌كانی سیاسی و كولتووری و سه‌ربازییه‌وه، له‌و په‌ڕی باشیدان، جیا له‌وه‌ش چه‌ندین تیمی شوێنه‌وارناسی ئیتاڵی له‌هه‌رێمی كوردستان له‌چوارچێوه و به‌هه‌ماهه‌نگی حكومه‌تی هه‌رێم كارده‌كه‌ن.