موسەننا ئەمین: هەندێک کەس لەرێگەی پرسی مووچەوە رێکلام بۆ خۆیان دەکەن
K24 - هەولێر
ئەندامێکی فراکسیۆنی یەکگرتوو لە پەرلەمانی عێراق بە پێویستی دەزانێت "بابه‌تی مووچه‌ی مووچه‌خۆر و فەرمانبەرانی هەرێمی کوردستان له‌ده‌ره‌وه‌ی ناكۆكییه سیاسییه‌كان بێت" و دەڵێت، "هەندێک کەس پرسی مووچە بەکاردەهێنن بۆ ئەوەی رێکلام بۆ خۆیان بکەن".
ئەمڕۆ چوارشەممە، 11ـی ئۆکتۆبەری 2023، موسەننا ئەمین، ئەندامی پەرلەمانی عێراق لەبارەی دابەشکردنی مووچەی فەرمانبەر و مووچەخۆرانی هەرێمی کوردستان، بە کوردستان24ـی راگەیاند، "مادام نەوتی کوردستان بەدەست حکومەتی عێراقە، پێویستە حکومەتی عێراق مووچەی فەرمانبەرانی هەرێمی کوردستان بدات، بەڵام دەبێت بە شێوەیەکی دەستووری و یاسایی بێت و پێچەوانەی قەوارەی هەرێمی کوردستان نەبێت".
وەکو ئەوەی موسەننا ئەمین باسی دەکات، هەندێک کەس لە رێگەی بابەتی مووچەی مووچەخۆر و فەرمانبەرانی هەرێمی کوردستانەوە رێکلام بۆ خۆیان دەکەن و هەوڵدەدەن هەست و سۆزی هاووڵاتییان بۆ خۆیان ڕابکێشن و نایانەوێت کێشەی مووچە چارەسەرببێت.
موسەننا ئەمین، کە هاوکات ئەندامی فراکسیۆنی یەکگرتوویی ئیسلامیی کوردستانە لە پەرلەمانی عێراق؛ بە پێویستی دەزانێت "بابه‌تی مووچه‌ی مووچه‌خۆر و فەرمانبەرانی هەرێمی کوردستان له‌ده‌ره‌وه‌ی ناكۆكییه سیاسییه‌كان بێت و تێكه‌ڵی كێشه و ململانێكان نه‌كرێت".