عیرفان کەرکووکی: جەخت لەسەر مافی تورکمان لە هەڵبژاردنی پەرلەمانی کوردستان دەکەینەوە

عیرفان کەرکووکی، سەرۆکی پارتی گەلی تورکمانی عێراق
عیرفان کەرکووکی، سەرۆکی پارتی گەلی تورکمانی عێراق

K24 – هەولێر:

سەرۆکی پارتی گەلی تورکمانی عێراق رایگەیاند، جەخت لەسەر مافی کۆتای تورکمان لە هەڵبژاردنەکانی پەرلەمانی کوردستان دەکات، هاوکات داواکارە ژمارەی کورسییەکانی کۆتای تورکمان لە پەرلەمانی کوردستان زیاد بکرێت. بەپێویستیشی دەزانێت هەڵبژاردنی پەرلەمانی کوردستان بە سیستەمی یەک بازنەیی ئەنجامبدرێت.

ئەمڕۆ یەکشەممە (22ـی تشرینی یەکەمی 2023) عیرفان کەرکووکی، سەرۆکی پارتی گەلی تورکمانی عێراق، رایگەیاند، "ئێمە لە پارتی گەلی تورکمان وەک پارتێکی کوردستانی جەخت لەسەر مافی کۆتای تورکمان لە هەڵبژاردنی پەرلەمانی کوردستان دەکەین، نەک هەر ئەوەندەش بەڵکو داوا دەکەین ژمارەی کۆتای تورکمان زیاد بکرێت، چونکە تورکمان پێکهاتەی دووەمی هەرێمی کوردستانە و پێکهاتەیەکی رەسەنی کوردستانە، هەروەها ئێمە لە پارتی گەلی تورکمانی داوا دەکەین، هەڵبژاردنی پەرلەمانی کوردستان بە سیستەمی بە یەک بازنەیی ئەنجامبدرێت، بۆ ئەوەی هەموو تورکمانێک لە هەر شوێنێکی کوردستان بتوانێت دەنگی خۆی بدات و نوێنەری راستەقینەی خۆی هەڵبژێرێت".

سەرۆکی پارتی گەلی تورکمانی عێراق، راشیگەیاند، پارتی گەلی تورکمانی سوورە لەسەر ئەوەی هەڵبژاردنی پەرلەمانی کوردستان لەکاتی خۆیدا ئەنجامبدرێت، هەروەها دژ بە هەموو سكاڵاکان دەوەستنەوە کە لە داگای فیدراڵی دژ بە کۆتای تورکمان و پێکهاتەکانی دیکە تۆمارکراون، وەک خۆی پێدەکات؛ کاریگەرییەکی نەرێنی لەسەر ئاشتی و پێکەوەژیان دەبێت کە لە ئێستادا لە کوردستان بەرقەرارە.

عیرفان کەرکووکی سەرنجی خستە سەر ئەوەی، لە هەرێمی کوردستان هەموو مافەکانیان پارێزراوە لە سایەی بەڕێوەبردنی دڵسۆزانە و زیرەکانەی سەرۆکوەزیران مەسرور بارزانی. هاوکات باسی لەوەشکرد، هەرگیز هەڵوێستی مرۆڤایەتی و کوردستانییەکانی سەرۆک بارزانی لەیاد ناکان کە هەمیشە پاڵپشت و قەڵای پۆڵایینی تورکمان بووە، ئاماژە بەوەشکرد، سەرۆک بارزانی لە سەخترین و دژوارترین قۆناغەکانی مێژوودا بوون بە سونبولی ئاشتی و پێکەوەژیان لە کوردستاندا.

سەرۆکی پارتی گەلی تورکمانی عێراق، هیوادارە رۆژێک لە رۆژان گەلی تورکمان پاش گەڕانەوەی کەرکووک و ناوچە کوردستانییەکانی دەرەوەی ئیدارەی هەرێم بۆ باوەشی کوردستان، لە کەرکووکیش بتوانن دەنگی خۆیان بۆ هەڵبژاردنی نوێنەری خۆیان بۆ پەرلەمانی کوردستان بدەن.