مونا قەهوەچی: کارێکی هەڵەیە کورسی کۆتاکان بەسەر پارێزگاکاندا دابەش بکرێت

مونا قەهوەچی، جێگری سەرۆکی پارتی چاکسازیی تورکمان
مونا قەهوەچی، جێگری سەرۆکی پارتی چاکسازیی تورکمان

K24 - هەولێر

جێگری سەرۆکی پارتی چاکسازیی تورکمان رایدەگەیەنێت، "وەک پێکهاتەکان لەگەڵ هەڵبژاردنێکی پاک و بێگەردی پەرلەمانی کوردستانین و داوا دەکەین مافی پێکهاتەی تورکمان پێشێل نەکرێت". دەشڵێت، "کارێکی هەڵەیە کورسی کۆتاکان بەسەر پارێزگاکاندا دابەش بکرێت".

ئەمڕۆ سێشەممە، 24ـی ئۆکتۆبەری 2023، مونا قەهوەچی، جێگری سەرۆکی پارتی چاکسازیی تورکمان لە کۆنفرانسێکی رۆژنامەوانیدا رایگەیاند: "سیستمی کورسی کۆتا بە یاسا دەستەبەرکراوە بۆ پێکهاتەکان و مەبەستی سەرەکیش لە پێدان و دابینکردنی کورسی کۆتا بۆ پێکهاتەکان بۆ پاراستنی ماف و گوزارشتکردن لە ویستەکانیان و بەرگریکردن لە مافەکانی خۆیان بووە؛ بۆیە گرنگە کە سیستەمی کۆتا لە ئێستادا وەکو خۆی بمێنێت و لەمڕۆوە پاشەکشە نەکرێت".

گوتیشی: "وەک پێکهاتەکان لە هەرێمی کوردستان لەگەڵ هەڵبژاردنێکی پاک و بێگەردین و لە کات و ساتی دیاریکراوی خۆیدا. بەڕێزگرتن لە ڕا و بووچۆنی پاراستنی مافی پێکهاتەکان، ئەمڕۆ وەک پێکهاتەکان داوای هاوکاری و پشتیوانی لە سەرجەم لایەنە سیاسییەکانی هەرێمی کوردستان دەکەین نەک بە پێچەوانەوە هەوڵ بۆ بچووکردنەوەی ڕۆڵی پێکهاتەکان لە گۆڕەپانی سیاسیی هەرێمی کوردستان بدەن".

ڕاشیگەیاند: "بەوپێیەی رێژەیەکی زۆری هاووڵاتییانی پێکهاتەی تورکمان دانیشتووی پارێزگای هەولێرن، بۆیە داوا دەکەین کە پێویستە ئەمە لەبەرچاو بگیرێت و، کارێکی هەڵەیە بە هۆکاری بوونی رێژەیەکی کەم لە هاووڵاتییانی تورکمان لە پارێزگاکانی دیکەی هەرێمی کوردستان دەژین، کورسی پێکهاتەی تورکمان دابەشبکرێت و مافی ئەو رێژە زۆرەی هاووڵاتییانی تورکمان لە پارێزگای هەولێر پێشێل بکرێت".

مونا قەهوەچی ئاماژەی بەوەش کرد، "پێکهاتەی تورکمان بۆیە سیستەمی کۆتای قەبووڵ کردووە، چونکە تا ئێستا لە عێراق و هەرێمی کوردستان سەرژمێرییەکی گونجاو ئەنجام نەدراوە و رێژەی ڕاستی هاووڵاتییانی پێکهاتەی تورکمان دیارینەکراوە".

جێگری سەرۆکی پارتی چاکسازیی تورکمان گوتیشی: "پێکهاتەی تورکمان داوای پاڵپشتی و هاوکاری لە نەتەوە یەکگرتووەکان و سەرجەم کونسوڵگەرییەکان لە هەرێمی کوردستان دەکات بۆ رێگریگرتن لە پێشێلکردنی مافی پێکهاتەی تورکمان و رێگە نەدرێت هیچ لایەنێکی سیاسی لە هەرێمی کوردستان دەستێوەردان لە مافی پێکهاتەی تورکمان لە هەرێمی کوردستان بکات".

ئەوەشی خستەڕوو: "وەک پێکهاتەی تورکمان رایدەگەیەنین، هەر دەستکاریکردنێک لە یاسای هەڵبژاردنی پەرلەمانی کوردستان و نەمانی کورسی کۆتا لە پەرلەمانی کوردستان، بە مانای سڕینەوەی ناسنامە، مێژوو، شارستانییەت و بوونی سیاسی نەتەوەی تورکمانە کە خۆی بەشێکە لە خاکی عێراق و هەرێمی کوردستان".