بە وێنە؛ بەڕێوەچوونی یەکەمین فێستیڤاڵی بەرهەمە ناوخۆییەکان لە بریفکا

K24 - هەولێر

بەیانی ئەمڕۆ چوارشەممە، 25ـی ئۆکتۆبەری 2023، یەکەم فێستیڤاڵی بەرهەمە ناوخۆییەکان و بەتایبەت سێوی دەڤەری بەرواری باڵا لە کۆمەڵگەی بریفکای سەر بە قەزای ئامێدی لە پارێزگای دهۆک، بە بەشداریی 50 جووتیار و هەنگەوان دەستیپێکرد و بۆ ماوەی سێ رۆژ بەردەوام دەبێت.

لە فێستیڤاڵەکەدا هەنگوین، سێو، ترێ، هەنار، سرکە، تەحین، برنج و چەندین بەرهەمی دیکەی ناوخۆیی جووتیارانی هەرێمی کوردستان، باکوور، رۆژهەڵات و رۆژئاوای کوردستانیش نمایش دەکرێن. 

بەیار حەجی، یەکێک لەو هەنگەوانانەی بەشداری لە فێستیڤاڵەکەدا کردووە؛ بە ئیسلام یوسف، پەیامنێری کوردستان24ـی گوت، "بەرهەمی هەنگوینی ئەمساڵی گوندەکەمان (ئورەیێ) زۆر کەمبووە و وەک ساڵی رابردوو نییە. هەنگوینەکەمان کواڵێتیی زۆر باشە و نرخەکەشی گونجاوە، کیلۆی بە 80 هەزار دینارە".

رەمەزان محەممەد، جووتیارێکی دیکەیە کە لە ئاکرێیەوە بۆ بەشداریکردن لە فێستیڤاڵەکە هاتووەتە کۆمەڵگەی باتیفا و دەڵێت: "لە ئاکرێیەوە بەرهەمە خۆماڵییەکانی وەکو برنج، ساوار، کونجی، سماق، تەحین، سرکە و هەنارمان هێناوە و هیوادارین ئەم جۆرە فێستیڤاڵانە بەردەوامییان هەبێت".

عەلی تەتەر، پارێزگاری دهۆک لەکاتی بەشداریکردنی لە فێستیڤاڵەکەدا بە کوردستان24ـی راگەیاند، رێکخستنی فێستیڤاڵەکە لەسەر راسپاردە و رێنوێنییەکانی سەرۆک بارزانی بووە؛ لە دوا سەردانیدا بۆ دەڤەری بادینان داوای کرد گرنگیی زیاتر بە کەرتی کشتوکاڵی و گەشتیاری بدرێت، بۆیە پێویستە ئەم جۆرە فێستیڤاڵانە بەردەوامییان هەبێت. 

ئامانج لە بەڕێوەچوونی فێستیڤاڵەکە وەکو ئەوەی پارێزگاری دهۆک باسی دەکات، نمایشکردن و بەبازاڕکردنی بەرهەمی جووتیارانی سنووری پارێزگای دهۆک و پارێزگاکانی دیکەی هەرێمی کوردستانە و، دەڵێت، "ئامانجی حکومەتی هەرێمی کوردستان ساخکردنەوەی بەرهەمی جووتیارانە لەناوخۆ و دەرەوەی هەرێمی کوردستان، هەر لەو چوارچێوەیەدا تا ئێستا هەزاران تۆن پەتاتەی جووتیارەکانمان رەوانەی وڵاتانی کەنداو کراون".

بە گوتەی عەلی تەتەر، "ئەگەر بە شێویەکی بەردەوام بەرهەمی جووتیاران لە بازاڕەکانی ناوخۆ و دەرەوەی هەرێمی کوردستاندا ساخبکرێتەوە، جووتیاران زیاتر روو لە کاری کشوکاڵی دەدەن و بەرهەمەکانیشیان زیاتر دەبێت. ئێمەش وەکو حکومەتی هەرێمی کوردستان بەردەوام دەبین لە کارکردن لەسەر ئەو مەبەستە".