بنکەیەکی سەربازیی ئەمەریکا لە رۆژئاوای کوردستان کرایە ئامانج

زرێپۆش و سەربازێکی ئەمەریکی لە رۆژئاوای کوردستان (وێنە: ئەرشیف - AFP)
زرێپۆش و سەربازێکی ئەمەریکی لە رۆژئاوای کوردستان (وێنە: ئەرشیف - AFP)

K24 - هەولێر

بنکەیەکی سەربازیی هاوپەیمانی نێودەوڵەتی بە 10 مووشەک لە رۆژئاوای کوردستان کرایە ئامانج و گرووپی "مقاومەی ئیسلامی عێراقی" ئەنجامدانی هێرشەکەی لە ئەستۆ گرت.

روانگەی سووریا بۆ مافەکانی مرۆڤ بڵاویکردووەتەوە، درەنگانی شەوی رابردوو، هەینی، 03-11-2023، بنکەی سەربازیی "خراب جیر"ـی هێزەکانی هاوپەیمانی نێودەوڵەتی دژی داعش، لە ناوچەی "رومێلان" لە پارێزگای حەسەکەی رۆژئاوای کوردستان؛ بە 10 مووشەک کراوەتە ئامانج.

چەند کاتژمێرێک دواتر، گرووپی چەکداریی "مقاومەی ئیسلامی عێراقی" لە راگەیەندراوێکدا ئەنجامدانی هێرشەکەی لە ئەستۆ گرت و ئەنجامدانی هێرشەکە بۆ سەر هێزەکانی ئەمەریکا و هاوپەیمانان لە رۆژئاوای کوردستان وەک "تۆڵەسەندنەوەیەک بۆ غەززە" ناوبرد.

زیانە گیانی و ماددییەکانی هێرشە مووشەکییەکە ئاشکرانەکراون و، تا ئێستا هێزەکانی هاوپەیمانان و وەزارەتی بەرگریی ئەمەریکا هیچ راگەیەندراوێکی فەرمییان لەبارەی ئەو هێرشەی لە رۆژئاوای کوردستان کراوەتە سەر هێزەکانیان بڵاونەکردووەتەوە.

ئەمە لە کاتێکدایە، لە 19ـی ئۆکتۆبەرەوە تاوەکو ئەمڕۆ شەممە، 04-11-2023، زیاتر لە 20 جار بە مووشەک و فڕۆکەی بێ فڕۆکەوان هێرش کراوەتە سەر بنکە سەربازییە جیاکانی هێزەکانی هاوپەیمانان و ئەمەریکا لە رۆژئاوای کوردستان. لە ئەنجامی هێرشەکاندا زیاتر لە 25 سەربازیی ئەمەریکا و هاوپەیمانان برینداربوون.