مەسرور بارزانی پێشوازی لە کونسوڵى گشتيى قه‌ته‌ر له هه‌رێمى كوردستان دەکات
K24 - هەولێر
سەرۆکوەزیران مەسرور بارزانی پشتیوانی حکومەتی هەرێمی کوردستان بۆ پەرەپێدانی پەیوەندیییەکانی هەولێر و دەوحە بۆ کونسوڵى گشتيى قه‌ته‌ر لە هەرێمی کوردستان دەردەبڕێت.
بەیانی ئەمڕۆ دووشەممە، 13-11-2023، مەسرور بارزانی، سەرۆکی حکومەتی هەرێمی کوردستان پێشوازیی له حسێن عه‌لى ساڵح ئه‌لفه‌زاله، کونسوڵى گشتيى قه‌ته‌ر له هه‌رێمى كوردستان كرد.
بە گوێرەی راگەیەندراوێکی حکومەتی هەرێمی کوردستان، بە بۆنەی کردنەوەی کونسوڵخانە و دەستبەکاربوونی وەک کونسوڵی گشتیی قەتەر، سەرۆکوەزیران پیرۆزبایی لە حسێن عه‌لى ساڵح ئه‌لفه‌زاله کردووە و هیوای سەرکەوتنی لە ئەرکەکەیدا بۆ خواستووە و هاوكارى و پشتیوانیی حکومەتی هەرێمی کوردستانی بۆ پەرەپێدانی پەیوەندیی دوولایەنە دەربڕیوە.
وەکو ئەوەی لە راگەیەندراوەکەدا هاتووە، "كونسوڵى گشتيى قه‌ته‌ڕ، سڵاو و ڕێزى خاوەنشکۆ ميرى قه‌ته‌ڕی بە سەرۆکوەزیران مەسرور بارزانی گەیاند و ئاماژەی بە پەیوەندی بەهێز و تایبەتی نێوان هەرێمی کوردستان و دەوڵەتی قەتەڕ کرد و ئامادەیی وڵاتەکەی بۆ بەهێزترکردنی پەیوەندییەکان له‌گه‌ڵ هه‌رێمى كوردستان نیشاندا به‌تايبه‌تى له بوارى وەبەرهێنان و ئابووريدا".
