پارێزگای هەولێر: بۆ 24 کاتژمێری داهاتوو سەرجەم فەرمانگە خزمەتگوزارییەکان خرانە حاڵەتی ئامادەباشییەوە
K24 – هەولێر:
پارێزگای هەولێر رایگەیاند، سه‌رجه‌م فه‌رمانگه خزمەتگوزارییەکان و لایه‌نه په‌یوه‌ندیداره‌كان سەبارەت بە نالەباری رەوشی کەشوهەوا بۆ 24 کاتژمێری داهاتوو خرانە حاڵەتی ئامادەباشییەوە.
ئەمڕۆ یەکشەممە (19ـی تشرینی دووەمی 2023) پارێزگای هەولێر راگەیەندراوێکی بڵاوکردەوە، تێیدا هاتووە، بە سەرپەرشتی ساسان عەونی، وەزیری شارەوانی و ئومێد خۆشناو، پارێزگاری هه‌ولێر، کۆبوونەوەیەکی تایبەت له‌گه‌ڵ سه‌رجه‌م بەرپرسانى فه‌رمانگه خزمەتگوزارییەکان و لایه‌نه په‌یوه‌ندیداره‌كان سەبارەت بە نالەباری رەوشی کەشوهەواو کە بەپێی پێشبینییەکانی کەشناسی لەماوەی 24 کاتژمێری داهاتوو رێژەیەکی زۆری دابارینی باران لەماوەیەکی کەمدا دەبارێ و مەترسی دروستبوونی لافاوی لێدەکرێت، ئەنجامدرا.
بە گوێرەی راگەیەندراوی پارێزگا، لە کۆبوونەوەکەدا، دواى هەڵسانگدنی رەوشەکە لەلایەن بەڕێوەبەری گشتی کەشناسی، بە دواداچوون بۆ سەرجەم ئەو هەنگاو و کارانە کرا کە لە ماوەى رابردوودا لەلایەن فەرمانگە خزمەتگوزارییەکانەوە، بۆ زستانى ئەمساڵ و وەرزى بارانبارین و رێگری و كه‌مكردنه‌وه‌ی مه‌ترسییه‌كانی لافاو و رووبەڕووبوونەوەى هەر ئەگەرێکى نەخوازارووى گۆڕانى کەش و هەواش گیراوەتەبەر، سەرجەم فەرمانگە خزمەتگوزارییەکان و لایەنە پەیوەندیدارەکان (بەرگری شارستانی، ئاسایش، پۆلیس، پۆلیسی هاتووچۆ، تەندروستی، شارەوانیەکان، تیمی ناوەنی قەیرانەکان، دەزگای خێرخوازی بارزانی، ئاو و ئاوەڕۆکان، ئاودێری) خرانە حاڵەتی ئامادەباشى تەواو بۆ روودانی هەر ئەگەرێکی نەخوازراو.
هەروەها گفتوگۆ لەبارەى هەموو ئەو هەگاوانەکرا کرا کە لە پێناو چارەسەرکردنی سەرجەم ئەو گیروگرفت و کێشانەى کە هۆکار و مەترسی بوونە بۆ کۆبوونەوەى ئاو ئەنجامدراون، وەک خاوێنکردنەوەى رێرەى ئاوى سروشتى باران و ئاوى قورس و کەندەکان و پاککردنەوەى سەرجەم چاڵەکانی ئاو وەرگرتن و مەنهۆلەکان و خاوێنكردنەوەی ئاوەڕۆكان لە گەڕەک و شەقامە سەرەکیەکان و شوێنە گشتیەکانی شارى هەولێر.
لە راگەیاندراوەکەدا ئاماژە بەوەشکراوە، لە کۆبوونەوەکەدا جەخت لە هەماهەنگی نێوان هەموو تیمەکان کرایەوە بۆ رووبەڕووبوونەوەی روودانی هەر ئەگەر و دۆخێکی قورس و لەناکاو، داواش لەهاووڵاتییان کرا هەمانگ و هاوکاری تیمەکان بن و پابەندی رێکارو رێنماییە خزمەتگوزارییەکان بن و نزیک نەبنەوە لە رووبارو ئەو شوێنانەی ئاستی ئاوییان بەرز دەبێتەوە لەکاتی ناچاریشدا نەبێت هاتووچۆی رێگاکانی دەرەوە نەکەن.