بە وێنە؛ مەسرور بارزانی کارگەی "ڤان ستیل"ـی کردەوە کە 700 هەلی کار دەرەخسێنێت
K24 - هەولێر
بەیانیی ئەمڕۆ سێشەممە، 28-11-2023، کاتژمێر 10:00؛ مەسرور بارزانی، سەرۆکی حکومەتی هەرێمی کوردستان کارگەی ئاسنی "ڤان ستیل"ـی لە هەولێر کردەوە کە گەورەترین کارگەی شیش و ئاسنە لە هەرێمی کوردستان و عێراق.
سەرۆکوەزیرانی هەرێمی کوردستان لە رێوڕەسمی کردنەوەی کارگەکە گوتارێکی پێشکەش کرد و رایگەیاند: "کارگەکە بە ستانداردی جیهانی و پێشکەوتووترین تەکنەلۆژیا دروستکراوە و سوودی بۆ ژێرخانی ئابووری لە هەرێمی کوردستان دەبێت".
کارگەکە 700 هەلی کاری راستەوخۆی رەخساندووە، بەپێی ئاماری کۆمەڵەی جیهانی ئاسن، رێژەی ناڕاستەوخۆی رەخساندنی هەلی کار لە پیشەسازی ئاسندا بریتیە لە 8.1، بەم پێیەش کارگەکە بەگشتی بڕی پێنج هەزار و 670 هەلی کار بەناڕاستەوخۆ دەڕەخسێنێت.
کردنەوەی کارگەی "ڤان ستیل" وەکو ئەوەی سەرۆکوەزیران ئاماژەی پێ دا: "رۆڵێکی گرنگی دەبێت لە بەرەوپێشبردنی کەرتی پیشەسازی لە کوردستان و رەخساندنی هەزاران هەلی کار بۆ گەنجانی کوردستان، جێی دەستخۆشییە کە کارگەکە پابەندبوونی خۆی بە لەبەرچاوگرتنی بنەماکانی پاراستنی ژینگە و بەردەوامی ژینگەیی دەربڕیووە، ئەمەش لە رێگەی بەکارهێنانی شێواز و تەکنیکی پێشکەوتوو کە دۆستی ژینگەیە".
