باڵیۆزی ژاپۆن له عێراق: گفتوگۆمان لەگەڵ مەسرور بارزانی بەرهەمدار بوو
K24 - هەولێر
فوتۆشی ماتسۆمۆتۆ، باڵیۆزی ژاپۆن له عێراق رایگەیاند، گفتوگۆیان لەگەڵ مەسرور بارزانی سەرۆکی حکومەتی هەرێمی کوردستان بەرهەمدار بووە و جەختیان لە پتەوکردنی پەیوەندییەکانی نێوان ژاپۆن و هەرێمی کوردستان کردووەتەوە، یەکێک لە تەوەرەکانی گفتوگۆی نێوانیان ناساندنی سیستەمی پەروەردەی ژاپۆنی بووە لە قوتابخانەکانی هەرێمی کوردستان.
دوێنێ سێشەممە 28/11/2023، لە رێوڕەسمی راگەیاندنی کۆمەڵەی دەرچووانی راهێنانەکانی جایکای ژاپۆنی لە هەولێر، کە مەسرور بارزانی سەرۆکی حکومەتی هەرێمی کوردستان و فوتۆشی ماتسۆمۆتۆ، باڵیۆزی ژاپۆن له عێراق ئامادەبوون، گفتوگۆیان لەسەر پەرەپێدانی پەیوەندییەکان و چەند پڕۆژەیەکی هاوبەش کردووە.
فوتۆشی ماتسۆمۆتۆ، باڵیۆزی ژاپۆن له عێراق لە تۆڕی کۆمەڵایەتی (ئێکس) تویتەری پێشوو نووسویەتی: "لەگەڵ مەسرور بارزانی سەرۆکی حکومەتی هەرێمی کوردستان، گفتوگۆیەکی بەرهەمدارمان هەبوو، هەروەها لەسەر دوو بیرۆکە قسەمان کرد بۆ پتەوکردنی پەیوەندییە دوولایەنەکان لەنێوان کوردستان و ژاپۆن، کە ئەوانیش گفتوگۆ کردن بوو سەبارەت بە ناساندنی سیستەمی پەروەردەی ژاپۆنی لە قوتابخانەکانی هەرێمی کوردستان و برەودان بە پڕۆژەی پاککردنەوەی ئاوی زێرابی هەولێر و پتەوکردنی ئاڵوگۆری بازرگانی بوو".
راشیگەیاندووە: "بەڵێنم بە سەرۆکی حکومەت دا کە هەموو هەوڵێکی خۆم دەخەمە گەڕ بۆ پتەوکردنی پەیوەندییەکانمان لەگەڵ هەرێمی کوردستان و هەروەها گرنگیدانمان بۆ دانووستانی ئاشتیانەی نێوان هەولێر و بەغدا".
لەبۆنەی ڕاگەیاندنی کۆمەڵەی دەرچووانی راهێنانەکانی جایکای ژاپۆنی، من لەگەڵ ريزدار مسرور بارزانی سەرۆکی حکومەتی هەرێمی کوردستان گفتوگۆیەکی بەرهەمدارمان هەبوو و هەروەها لەسەر دوو بیرۆکە قسەمان کرد بۆ پتەوکردنی پەیوەندیە دوولایەنەکان لە نێوان کوردستان و ژاپۆن، کە ئەوانیش گفتوگۆ کردن… pic.twitter.com/cZM4a6uw3V
— Futoshi Matsumoto 🇯🇵🇮🇶 (@JAPANAmbIRAQ) November 29, 2023