وەرزی لێکردنەوەی زیتوون لە پەرستگای لالش دەستیپێکرد
K24 - هەولێر
ئەمڕۆ چوارشەممە، 29-11-2023، بە بەشداریی زیاتر لە 400 منداڵ، گەنج، ژن و پیاو؛ وەرزی لێکردنەوەی زەیتوون لە پەرستگای لالش دەستیپێکرد. پڕۆسەکە بۆ ماوەی چوار رۆژ بەردەوام دەبێت، لەم ماوەیەدا هەموو زەیتوونی دارەکانی لالش لێدەکرێنەوە.
زیاتر لە 700 دار زەیتوون لە پەرستگای لالش هەن. پڕۆسەی لێکردنەوەی زەیتوونەکان بووەتە نەریتێکی کۆنی ئێزدییەکان و لە ئایینەکەیاندا پیرۆزیی خۆی هەیە. ساڵانە لە نیوەی مانگی تشرینی دووەم ئێزدییەکان لە دەرەوە و ناوەوەی هەرێمی کوردستان بە مەبەستی لێکردنەوەی زەیتوونەکان روو لە پەرستگای لالش دکەن.
رۆژانە نزیکەی 365 چرا لە پەرستگای لالش دادەگیرسێنرێت. ئەو زەیتوونانەی لە دارەکان لێدەکرێنەوە، بە چەند قۆناغێک دەکرێتە زەیتی زەیتوونی سرووشتی و بۆ داگیرساندنی چراکانی پەرستگاکە بەکاردەهێندرێت.
زەیتوون دارێکی بەسوودە لە ھەردوو بوارەکانی ئابووری و ژینگە. لە رووی تەندروستیشەوە رۆنی زەیتوون زۆر سوودبەخشە بۆ مرۆڤ، چونکە شلە رۆنەکەی زەیتوون بە ھیچ جۆرێک کۆلیسترۆڵی زیانبەخشی تێدانییە بەڵکوو کۆلیسترۆڵی سوودبەخشی تێیدایە کە دەبێتە ھۆی توانەوەی کۆلیسترۆڵی زیان بەخش.
زەیتوون دارێکی ھەمیشە سەوزە کە حەز لە بناری شاخ و کەناراوەکان دەکات و مێژووی ئەو دارە زۆر کۆنە و لە ئایینە پیرۆزەکانیش ناوی هاتووە.
