پشتیوان سادق لە چیک بەشداری لە کۆنفرانسی وەزاری نێودەوڵەتی ئازادی ئایینی و بیروڕا دەکات

وەزیری ئەوقاف و کاروباری ئایینی حکومەتی هەرێمی کوردستان لە چیک
وەزیری ئەوقاف و کاروباری ئایینی حکومەتی هەرێمی کوردستان لە چیک

K24 – هەولێر:

وەزیری ئەوقاف و کاروباری ئایینی حکومەتی هەرێمی کوردستان لە چیک بەشداری لە کۆنفرانسی وەزاری نێودەوڵەتی ئازادی ئایینی و بیروڕا  کرد و تێیدا دیدار و کۆبوونەوەی لەگەڵ ژمارەیەک بەرپرس و سیاسەتمەداری ئەوروپی ئەنجامدا.

ئەمڕۆ چوارشەممە (29ـی تشرینی دووەمی 2023) لەسەر بانگهێشتی فەرمی وەزیری دەرەوەی کۆماری چیک، پشتیوان سادق، وەزیری ئەوقاف و کاروباری ئایینی حکومەتی هەرێمی کوردستان بەشداری لە کۆنفرانسی وەزاری نێودەوڵەتی ئازادی ئایینی و بیروڕا  کرد، کە کۆنفرانسەکە بەبەشداری ژمارەیەکی دیاریکراو لە وەزیر، سەرکردە، بیرمەند، کەسایەتییە رۆشنبیرییەکانی بواری ئایینی، دیبلۆماسی و سیاسی بەرێوەچوو.

لەمیانی کۆنفرانسەکەدا وەزیری ئەوقاف و کاروباری ئایینی حکومەتی هەرێمی کوردستان زانیاری لەسەر پێکەوەژیانی ئایینی و ئازادی ئایینی لەکوردستان پێشکەشکرد و دیمەنی جوانی تەبایی و گیانی پێکەوەیی نێوان ئایینەکانی ھەرێمی کوردستان بۆ بەشداربووانی کۆنفرانسەکە خستەڕوو، هاوکات لە کۆنفرانسەکەدا چەندین لێکۆڵینەوە و توێژینەوەی ئەکادیمی پێشکەشکران.

رۆژی (6ـی شوباتی 2023) لەسەر بانگھێشتی ئەنجومەنی دانایانی موسوڵمانان کە بارەگای سەرەکی لە ئیماراتی عەرەبییە و شێخی ئەزھەر و پاپای ڤاتیکان سەرپەرشتی دەكەن، پشتیوان سادق، وەزیری ئەوقاف و كاروباری ئایینی، بەشداری لە ڕێوڕەسمی پێشکەشکردنی "خەڵاتی شێخ زاید بۆ برایەتی و مرۆڤایەتی" كرد. 

ئەم خەڵاتە ساڵانە پێشکەشی چەند کەسایەتییەکی کاریگەر دەکرێت، کە لەسەر ئاستی تاک و ڕێکخراوەکان و حکومەت، کاریان لەسەر پێکەوەژیان و برەودان بە ئاشتی و تەبایی و کاری خێرخوازی کردووە. 

ھەر لە میانی سەردانیان، پشتیوان سادق چاوی  بە ژمارەیەک کەسایەتیی ئایینی و جیھانی کە کار بۆ تەبایی و پێکەوەژیانی ئایینی دەكەن، كەوت؛  لەوانە  نھیان بن موبارەک ئال نھیان، وەزیری لێبوردەیی ئیمارات،  تۆنی بلێر، سەرۆکوەزیرانی پێشووی بەریتانیا و چەندین رێكخراو و كەسایەتیی دیكە.