وەزارەتی کارەبا: دۆخی سیستمی کارەبا ئاسایی بووەوە

ژمارەیەک کارمەندی بەشی تەکنیکی سەر بە وەزارتی کارەبا
ژمارەیەک کارمەندی بەشی تەکنیکی سەر بە وەزارتی کارەبا

K24 – هەولێر:

وەزارەتی کارەبای حکومەتی هەرێمی کوردستان رایگەیاند، دۆخی سیستمی کارەبا ئاسایی بووەوە و لە هەوڵی بەردەوامدایە بۆ زیادکردنی بەرهەم و گەڕانەوە بۆ بەرنامەی ئاسایی پێدانی کارەبا.

رۆژی هەینی (1ـی کانوونی دووەمی 2023) وەزارەتی کارەبای حکومەتی هەرێمی کوردستان راگەیەندراوێکی بڵاوکردەوە و تێیدا هاتووە، "تیمەکانی کارەبا لەوانە کۆنترۆڵی کارەبای هەرێم و کۆنترۆڵی شارەکان و لایەنە پەیوەندارەکانی وەزارەتی کارەبا گرفتی کوژانەوەی گشتیی کارەبایان چارەسەر کرد و دۆخی کارەبا ئاسایی بووەوە".

وەزارەتی کارەبا ئاماژەی بەوەکردووە، لە هەوڵی بەردەوام دان بۆ زیادکردنی بەرهەم و گەڕانەوە بۆ بەرنامەی ئاسایی پێدانی کارەبا.

پێشتر وەزارەتی کارەبا رایگەیاندبوو، "بەهۆی گرفتێکی تەکنیکییەوە، کوژانەوەی گشتی لە سیستمی کارەبای هەرێم روویدا و تیمەكانی وەزارەتی كارەبا سەرقاڵی چارەسەرکردنی کێشەکە و گەڕانەوەی كارەبای گشتین و بەم زووانە کێشەی کوژانەوەی گشتی چارەسەر دەکرێت".

وەزارەتی کارەبا روونیکردبووەوە، "ئێوارەی رۆژی پێنجشەممه‌، بەهۆی گرفتێكی تەكنیكییەوە، تەواوی یەكەكانی بەرهەمهێنانی كارەبای هەرێم كوژانەوە و تیمەکانی وەزارەتی كارەبا دەمودەست کێشەکەیان چارەسەر كرد. بەڵام كاتژمێر (1:00)ی شەو بۆ جاری دووەم كوژانەوەی گشتی روویدا".