هێمن میرانی: بە راسپاردەی مەسرور بارزانی لە هۆکارەکانی توندوتیژی دژی ئافرەتان دەکۆڵینەوە و رێگری لە ئەنجامدانی دەکەین

هێمن میرانی
هێمن میرانی

K24-هەولێر:

بەڕێوەبەری گشتی دیوانی وەزارەتی ناوخۆی حکومەتی هەرێمی کوردستان دووپاتی دەکاتەوە، بە راسپاردەی سەرۆکوەزیران مەسرور بارزانی کار لەسەر هۆکار و پاڵنەرەکانی توندوتیژی دژی ئافرەتان دەکەن و رێگری لە توندوتیژی بەر لە ئەنجامدانی دەکەن.

لەبارەی دیدگای سەرۆکوەزیران مەسرور بارزانی بۆ پاراستنی مافی ئافرەتان و رووبەرووبونەوەی توندوتیژی دژی ژنان، ئەمڕۆ سێشەممە (5-ی کانوونی یەکەمی2023)، د.هێمن میرانی بەڕێوەبەری گشتیی دیوان لە وەزارەتی ناوخۆ بۆ ژووری هەواڵی کوردستان24 ئاماژەی بەوە کرد، ئەمڕۆ لەسەر فەرمانی سەرۆکوەزیران مەسرور بارزانی، کۆبوونەوەیەکی گرنگ بەسەرپەرشتی وەزیری ناوخۆ بەرێوەچوو، ئەوانەی لە کۆبوونەوەکەشدا بەشداربوون ئەو لایەنانە بوون کە راستەخۆ پەیوەندیدارن و سەر و کاریان لەگەڵ بابەتەکانی توندوتیژی و بەرەنگاربوونەوەی فۆرمە جۆراوجۆرەکانی تاوانن کە ئافرەت و خێزان تێیدا دەبنە قوربانی.

بەڕێوەبەری گشتی دیوانی وەزارەتی ناوخۆ رایگەیاند، دامەزراوەکانی تایبەت بە رووبەڕووبونەوەی توندوتیژی دژی ئافرەتان و رێکخراوەکانی کۆمەڵگەی مەدەنی، لە کۆبوونەوەکەدا هۆکار و پاڵنەرەکانی توندوتیژیان بە وەزیری ناوخۆ گەیاند، مەسرور بارزانی سەرۆکوەزیران  وەزارەتی ناوخۆی راسپاردووە بۆ لێکۆڵینەوە لە هۆکارەکانی توندوتیژی دژی ئافرەتان نەوەک لێکەوتەکانی، میرانی بە پێویستی زانی هەمووان بەیەکەوە کار بۆ ئاسایشی خێزان بکەن، گوتیشی، لە کۆبوونەوەکەدا باس لە کۆمەڵێک فۆرمی تاوان کرا کە لە ئەنجامی پێشکەوتنەکانی تەکنەلۆژیا روودەدەن و بوونەتە تاوانی ئەلیکترۆنی و هەڕەشەیەکی جدی لەسەر خێزان بە هەردوو رەگەزەوە، ئەو بابەتانە بە وردی تاووتوێ دەکرێت و بە راپۆرت دەدرێتە سەرۆکوەزیرانی هەرێمی کوردستان.

هێمن میرانی بە پێویستی زانی دامەزراوەکانی پەیوەندیدار بە رووبەرووبونەوەی توندوتیژی لەگەڵ وەزارەتی ناوخۆ هەماهەنگی  بکەن بۆ دیاریکردنی هۆکارەکانی ئەنجامدانی توندوتیژی دژی ئافرەتان، بەتایبەتیش میدیا و کەناڵە تەلەڤزیۆنیەکان بەرپرسیارەتی خۆیان بەرامبەر کۆمەڵگە نیشان بدەن.

هێمن میرانی لە بەشێکی دیکەی قسەکانیدا ئاشکرایکرد، وەزیری ناوخۆ لەسەر راسپاردەی سەرۆکوەزیرانی هەرێمی کوردستان دووپات لەوە دەکاتەوە،  پێشگری لە توندوتیژی بکرێت بۆ ئەوەی کەس نەبێتە قوربانی و کەمترین زەمینە بۆ توندوتیژی هەبێت.

میرانی هەوڵی هونەرمەندان و رۆڵی درامای لە هۆشیارکردنەوەی کۆمەڵگە لە توندوتیژی بە گرنگ وەسفکرد و گوتی: لە رێگەی درامای کوردی دەتوانین هۆشیاری بۆ رووبەرووبونەوەی توندوتیژی دژی ئافرەتان بڵاوبکەینەوە، پێی وابوو  فیلمسازان دەتوانن رۆڵی گرنگیان هەبێت بە فیلم و بەرهەمە هونەرییەکانیان و کاریگەری لەسەر کۆمەڵگە دروستبکەن بە نیشاندانی کاریگەرییە خراپەکانی توندوتیژی بە بینەری کورد، هاوکات چاوی بینەری کورد بە کولتووری جوانی کوردی ئاشنا بکەن لە بری پلاتفۆرمەکان کە بوونەتە هۆکاری کێشەی خێزانی، میرانی ئاشکرایکرد، بۆ لەمەودوا کار لەگەڵ وەزارەتی رۆشنبیری و میدیا و دامەزراوەکانی کۆمەڵگەی مەدەنی دەکەن بۆ ئەوەی دەرفەتی توندوتیژی زۆر کەمبکەنەوە .

لەبارەی کاریگەری بەشداری ئافرەتانیش لە ناوەندەکانی بڕیار و حکومڕانی، هێمن میرانی گوتی: ئافرەت کە خۆی دێتە نێو کایە جیاوازەکانی حکومڕانی و دامەزراوەکان، دەتوانێ خۆی چارەسەرییەکان پێشکەش بکات و گرفتەکان رەنگ بکات بۆ ئەوەی لە چاوی هەموومان دیاربێت و بزانین ئەو کێشانە کامانەن کە دووچاری ئافرەتان دەبێتەوە، ئاشکراشیکرد، یەکێ لە کارە گرنگەکانی وەزارەتی ناوخۆ دەرفەتدانە بە ئافرەت بۆ ئەوەی ببێتە سەرکردەو بەشێک لە بڕیار.

کارزان حەیدەر