سبەی ماراسۆنی پەروەردە و دەستپاکی لە هەولێر بە سپۆنسەری میدیایی کوردستان24 بەڕێوەدەچێت

ماراسۆن لە هەولێر
ماراسۆن لە هەولێر

K24 – هەولێر:

بەبۆنەی رۆژی جیهانی بەرەنگاربوونەوەی گەندەڵی، سبەی لە هەولێر ماراسۆنێک بەڕێوەدەچێت کە کوردستان24 سپۆنسەری میدیایی دەکات.

رۆژی هەینی (8ـی کانوونی یەکەمی 2023) لە پارکی سامی عەبدولرەحمانی شاری هەولێر، بەبۆنەی رۆژی جیهانی بەرەنگاربوونەوەی گەندەڵی، پرۆگرامی پەرەپێدانی نەتەوە یەکگرتووەکان (UNDP) بە هاوبەشی لەگەڵ دەستەی دەستپاکی و وەزارەتی پەروەردەی حکومەتی هەرێمی کوردستان هەڵدەستێت بە سازدانی ماراسۆنی پەروەردە و دەستپاکی بە هەڵمەتی (#پەیامەکەت_بگەینە).

ئەم چالاکییە لەلایەن یەکێتی ئەوروپا لە چوارچێوەی پرۆژەی دەستپێشخەریی بەرەنگاربوونەوەی گەندەڵی و بەهێزکردنی ناوبژیوانی بازرگانی، هاوکاری دەکرێت و کوردستان24 سپۆنسەری میدیایی دەکات.

بڕیار وایە سبەی هەینی کاتژمێر 10ـی بەیانی ماراسۆنەکە دەستپێبکات و لە رێورەسمەکەشدا چەند وتارێک پێشکەش بکرێت لەوانەش، نوێنەری پڕۆگرامی پەرەپێدانی نەتەوەیەکگرتووەکان، سەرۆکی دەستەی دەستپاکی، وەزیری پەروەردەی حکومەتی هەرێمی کوردستان و پارێزگاری هەولێر و دابەشکردنی خەڵات بەسەر سەرکەوتووانی ماراسۆنەکە.