پارتی: لە نەینەوا بەبێ ئێمە پارێزگار دانانرێ

kurdistan24.net

K24 - هەولێر

بەرپرسی بەشی هەڵبژاردنی لقی 23ی پارتی دیموکراتی کوردستان لە مەخموور رایگەیاند: مەرج نییە ئێمە پارێزگار دابنێین، بەڵام بەبێ ئێمە پارێزگار دانانرێت، کەواتە حکومەتی خۆجێی نەینەوا پارتی دیموکراتی کوردستانی تێدادەبێت و بە پێگەیەکی بەهێزەوە لەوێ دەبێت.

یەحیا عەبدولکەریم، بەرپرسی بەشی هەڵبژاردنی لقی 23ی پارتی دیموکراتی کوردستان لە مەخموور، لە میانی گەشتێکی هەواڵەکانی کوردستان24 گوتی: "هەشت رۆژ بۆ هەڵبژاردنی ئەنجومەنی پارێزگاکان ماوە، ئەوەی ئێمە لە بانگەشە دەیکەین بە بەرنامە کردوومانە، بەشێوەیەکی هێمنی بانگەشە دەکەین، بە قۆناغ بە قۆناغ کردوومانە بەو شێوەی کە بڕیاری لەسەر دراوە".

گوتیشی: "لە سنووری قەزای مەخموور، گوێڕ، کەندێناوە و قەراج دوو پێکهاتەی سەرەکی لە رووی نەتەوەییەوە پێکەوە دەژین ئەویش کورد و عەرەبە، عەرەبی رەسەنی ناوچەکەن، هاتووچۆیان لەگەڵ خەڵکی ناوچەکە هەیە و خۆشیان بە خەڵکی کوردستان دەزانن، چونکە مەخموور لە ساڵی 1996وە چووەتە سەر پارێزگای نەینەوا، لە نزیکەوە ئاگاداریش بووین خەڵکە عەرەبەکە دەنگیان بە کاندیدەکانی ئێمەداوە، لە ساڵی 2021 دوو کاندیدمان هەبوو هەردووکیان لە نەتەوەی عەرەب بوون، کورد و عەرەبیش دەنگیان پێدان، بۆ ئەنجومەنی نوێنەرانی عێراق کاندیدمان هەبووە کورد بووە عەرەبەکانیش دەنگیان پێداون، جیاوازی نەتەوەیی لەوێ زۆر کەمە".

یەحیا عەبدولکەریم، ئاماژەی بەوەشدا: "ئێمە ئومێدمان زۆرە هەردوو نەتەوە دەنگ بە کاندیدەکانی ئێمە دەدەن، کاندیدەکانیشمان لە رووی نەتەوەییەوە کورد و عەرەبیشی تێدایە کاندیدی ئافرەتیشمان هەیە، دابەشیشمان کردووە، لە گوێڕ و قەراج و کەندێناوە، بەپێی شوێنەکان کاندیدمان هەیە و خەڵکمان هەیە، ئێمە پێمان وایە دەنگی عەرەب و کورد وەکو یەک بۆ لیستی پارتی دێت".

بەرپرسی بەشی هەڵبژاردنی لقی 23ی مەخموور ئاماژەیدا، لە نەینەوا پێگە و سەنگی خۆمان هەبووە، تارادەیەکی زۆرباش کورسیمان هەبووە لە ساڵی 2021 نۆ کورسیمان هەبووە، ئێستاش پێمان وایە دەنگی باش دەهێنین و کورسی باشیش مسۆگەر دەکەین لە ناوچەکە، دەنگی لایەنەکانی دیکە کەمە لە نەینەوا وەکو شاری کەرکووک نییە، ئەوەی پێگەی باش بێت لەو سنوورە پارتی دیموکراتی کوردستانە لەگەڵ لایەنی دیکەی عەرەب، بەڵام تاکو ئێستا کە ئێمە تێبینیمان کردووە پارتی زۆرترین دەنگ دەهێنێت".

ئەوەشی خستەڕوو: "ژمارەی کورسییەکان کەمیکردووە پێشووتر زیاتر بوو، مەرج نییە ئێمە پارێزگار دابنێین، بەڵام بەبێ ئێمە پارێزگار دانانرێ کەواتە حکومەتی خۆجێی نەینەوا پارتی دیموکراتی کوردستانی تێدادەبێت و بە پێگەیەکی بەهێزەوە لەوێ دەبێت".

بەرپرسی بەشی هەڵبژاردنی لقی 23ی مەخموور، ئاماژەی بەوەشکرد: "لە شەڕی داعش پارتی دیموکراتی کوردستان بەرگری لەو ناوچانە کرد، شکۆی پارتی لەو ناوچانە پارێزراوە، پارتی لەو سنوورانە خزمەتگوزاری باشی پێشکەش بەو هاووڵاتییانی ئەو ناوچانە کردووە و خەڵکی پاراستووە، ئێمە لە سنوورەکە هەین بوونمان هەیە".