كۆمیسیۆنی راگه‌یاندن و گه‌یاندن داوا له‌ ده‌زگا راگه‌یاندنه‌كان ده‌كات پابه‌ندی واده‌ی "بێده‌نگی راگه‌یاندن" بن

لۆگۆی كۆمیسیۆنی راگه‌یاندن و گه‌یاندن
لۆگۆی كۆمیسیۆنی راگه‌یاندن و گه‌یاندن

K24 - هەولێر:

كۆمیسیۆنی راگه‌یاندن و گه‌یاندن داوا له‌ سه‌رجه‌م ده‌زگا راگه‌یاندنه‌كان ده‌كات پابه‌ندی واده‌ی "بێده‌نگی راگه‌یاندن" بن كه‌ كۆمیسیۆنی باڵای هه‌ڵبژاردنه‌كان دیاری كردووه‌.

ئه‌مڕۆ (دووشه‌ممه‌ 11ـی كانوونی یه‌كه‌می 2023) كۆمیسیۆنی راگه‌یاندن و گه‌یاندن له‌ راگه‌یه‌ندراوێكدا داوای له‌ سه‌رجه‌م ده‌زگا راگه‌یاندنه‌كان كردووه‌ پابه‌ندی واده‌ی دیاریكراوی "بێده‌نگی راگه‌یاندن" بن كه‌ كۆمیسۆنی باڵای هه‌ڵبژاردنه‌كانی عێراق ماوه‌ی 15 بۆ 18ـی ئه‌م مانگه‌ی دیاری كردووه‌.

كۆمیسیۆنی راگه‌یاندن و گه‌یاندن رایگه‌یاندووه‌، له‌پێناو سه‌رخستنی پڕۆژه‌ی هه‌ڵبژاردنه‌كانی ئه‌نجوومه‌نی پارێزگاكان وه‌ك پڕۆسه‌یه‌كی دیموكراسی، داوا له‌ سه‌رجه‌م دامه‌زراوه‌ و ده‌زگا میدیاییه‌كان ده‌كات هه‌موو به‌رپرسیاریه‌تییه‌كی نیشتمانی هه‌ڵبرگن به‌تایبه‌تی بۆ كردنه‌وه‌ی بوار له‌ به‌رده‌م ده‌نگداران بۆ یه‌كلاییكردنه‌وه‌ی بژارده‌ و كاندیده‌كانیان و دوور له‌ فشاری هه‌ر جۆره‌ پڕوپاگه‌نده‌یه‌كی هه‌ڵبژاردن.

كۆمیسیۆنی راگه‌یاندن و گه‌یاندن روونیكردووه‌ته‌وه‌ پابه‌ندبوونه‌كه‌ كاتژمێر 6ـی به‌یانی رۆژی هه‌ینی داهاتوو 15ـی كانوونی یه‌كه‌م تاوه‌كو داخستنی دوایین بنكه‌ی ده‌نگدان له‌ رۆژی 18ـی مانگ كه‌ ده‌كاته‌ رۆژی دووشه‌ممه‌ ده‌گرێته‌وه‌.

بڕیارە رۆژی 18ـی کانوونی یەکەمی ئەمساڵ، هەڵبژاردنی ئەنجوومەنی پارێزگاکانی عێراق بێجگە لە پارێزگاکانی هەرێمی کوردستان بەڕێوەبچێت. زیاتر لە 23 ملیۆن و 368 هەزار کەس دەتوانن لەم هەڵبژاردنەدا دەنگ بدەن.

بەگوێرەی ئامارەکانی کۆمیسیۆنی باڵای هەڵبژاردنەکانی عێراقیش، بۆ هەڵبژاردنی ئەنجوومەنی پارێزگاکانی عێراق، ناوەندەکانی دەنگدان و وێستگەکان لەلایەن فەرمانبەرانی دەوڵەت و خوێندکارانی زانکۆ و دەرچووان بەڕێوەدەبرێن كه‌ ژماره‌یان 214 هەزار و 595 کارمەندە.

لەبارەی ژمارەی کورسی ئەنجوومەنی پارێزگاکان، لە یاسای ژمارە (4)ـی ساڵی 2023 کە تایبەتە بە هەموارکردنەوەی سێیەمی یاسای هەڵبژاردنەکانی پەرلەمانی عێراق و ئەنجوومەنی پارێزگاکانی ژمارە (12)ـی ساڵی 2018، زۆرترین کورسی لە بەغدای پایتەختە بە 49 کورسی و دوای ئەویش پارێزگای نەینەوا دێت بە 26 کورسی و پارێزگای بەسرەش 22 کورسی هەیە و پارێزگای کەرکووکیش 15 کورسی هەیە. بەشێوەیەک، کۆی گشتی ژمارەی کورسی ئەنجوومەنی هەر 15 پارێزگاکە بریتییە لە 275 کورسی و 75 کورسییان تایبەتە بە کۆتای ئافرەتان.